باقىتجان ساعىنتايەۆ وليمپياداعا قاتىساتىن سپورتشىلارعا جەڭىس تىلەدى

ايتا كەتەيىك، بۇگىن ۇكىمەت وتىرىسىندا پحەنچحان قالاسىندا وتەتىن XXIII وليمپيادا ويىندارىنا دايىندىققا بايلانىستى ق ر مادەنيەت جانە سپورت ءمينيسترى ارىستانبەك مۇحامەدي ۇلىنىڭ، سونداي-اق سپورت سالاسى وكىلدەرىنىڭ بايانداماسى تىڭدالدى.

«قىسقى وليمپيادا ويىندارىنىڭ باستالۋىنا از ۋاقىت قالدى، وسى ورايدا ونىڭ اشىلۋىن اسىعا كۇتەمىز. ءبىزدىڭ سپورتشىلارعا ساتتىلىك ءارى جەڭىس تىلەيمىز. سپورتشىلارىمىز ەل ءۇمىتىن اقتاپ، مەدالدارمەن ورالادى دەپ ۇمىتتەنەمىز»، - دەدى ۇكىمەت باسشىسى.

وڭتۇستىك كورەيانىڭ پحەنچحان قالاسىندا وتەتىن XXIII وليمپيادا ويىندارىنىڭ باستالۋىنا تۋرا 10 كۇن ۋاقىت قالدى. وسىعان دەيىن حابارلاعانىمىزداي تورتكىل دۇنيە كوز تىگەتىن باستى دوداعا قازاقستان قۇراماسى 57 جولداما جەڭىپ العان بولاتىن. وتانداستارىمىز سپورتتىڭ 9 تۇرىنەن سىنعا تۇسەدى.

«قازىرگى كەزدە قۇراما كوماندا وليمپيادا ويىندارىنا دايىندىقتىڭ قورىتىندى كەزەڭىنەن ءوتىپ جاتىر. حەلسينكيدە الەم چەمپيوناتىندا مانەرلەر سىرعاناۋدان قازاقستاندىق ەليزابەت تۇرسىنبايەۆانىڭ ءساتتى ونەر كورسەتۋىنىڭ ارقاسىندا، قازاقستان تاريحىندا العاش رەت بىردەن ەكى مانەرلەپ سىرعاناۋشى جەكە سىرعاناۋدان وليمپياداعا قاتىسادى. سونىمەن قاتار قازاقستان اتىنان سوچيدەگى وليمپيادا ويىندارىنىڭ قولا جۇلدەگەرى دەنيس تەن شىعادى. بۇدان بولەك، قازاقستاندىق بياتلونيستەر مەرزىمىنەن بۇرىن وليمپياداعى 10 جولدامانى جەڭىپ الدى»، - دەپ اتاپ ءوتتى ق ر مادەنيەت جانە سپورت ءمينيسترى ارىستانبەك مۇحامەدي ۇلى.

جالپى، 2016-2017-جىلدارداعى ماۋسىمدا قازاقستاننىڭ قۇراما كومانداسى قىسقى سپورت تۇرلەرىنەن ءتۇرلى رەسمي سپورتتىق شارالاردا 129 مەدال جەڭىپ الدى. ونىڭ ىشىندە 37 التىن، 38 كۇمىس جانە 54 قولا مەدال بار.

اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى