وليمپيادادا چەمپيون بولادى دەپ ەشكىمدى ايتا المايمىن - نەسىپ جۇنىسبايەۆ
ءبىز تالاي وليمپيادا ويىندارىندا قازاقستان سپورتشىلارىنىڭ جەتىستىكتەرىنە كۋا بولعان، توم-توم كىتاپتار شىعارعان نەسىپ جۇنىسبايەۆ مىرزادان بيىلعى «وڭتۇستىك كورەيانىڭ پحەنچحان قالاسىندا وتەتىن XXIII وليمپيادا ويىندارىندا كىمدەرگە ءۇمىت ارتۋعا بولادى» دەگەن ساۋال تاستاعان بولاتىنبىز.
«ەڭ اۋەلى شاڭعى سپورتىنان الەكسەي پولتورانيننىڭ مۇمكىندىگى بار دەپ باعالايمىن. ول جىگىت وسىعان دەيىن «بىردە بيە، بىردە تۇيە» بولىپ جورتىپ ءجۇر. بيىل ونىڭ سوڭعى مۇمكىندىگى. ەندى ءتورت جىلدان كەيىن ول وليمپياداعا بارىپ مەدال الادى دەگەنگە ءوز باسىم سەنبەيمىن. سوندىقتان ول پحەنچحاندا 10-15 شاقىرىمنىڭ بىرەۋىندە سوڭعى رەت بار كۇش-جىگەرىن سارقىپ، مەدالعا ۇمتىلاتىن بولۋى مۇمكىن»، - دەپ اتاپ ءوتتى ول.
نەسىپ جۇنىسبايەۆتىڭ پىكىرىنشە، دميتريي رەيحەرد، يۋليا گالىشيەۆا جانە قازاقتىڭ قاراكوز قىزى جانبوتا الدابەرگەنوۆالارعا ءۇمىت ارتۋعا بولادى. «ءوز باسىم وسى اتى اتالعان سپورتشىلار ەل قورجىنىنا جۇلدە سالسا ەكەن دەپ ارماندايمىن»، - دەدى سپورت جۋرناليستيكاسىنىڭ ارداگەرى.
«ءۇشىنشى، شورت-ترەكتەن ابزال اجىعاليەۆ، نۇربەرگەن جۇماعازيەۆ باستاعان جىگىتتەرىمىز جۇلدەگە ىلىگىپ قالۋى مۇمكىن. ءبىراق، وڭتۇستىك شىعىس ازيا ەلدەرىندە، اتاپ ايتقاندا كورەيادا وتكەن جارىستاردا ءبىزدىڭ جىگىتتەرگە وتە قيىن بولادى. سەبەبى، كورەيانىڭ ءوزىنىڭ جىگىتتەرى كەرەمەت، قىتاي دا جامان ەمەس، جاپوندار دا بۇل سپورت تۇرىنە ەرەكشە كوڭىل بولگەن. دەسە دە، ءوز باسىم جۇلدەگە ءىلىنىپ قالادى-اۋ دەپ جوسپارلاپ وتىرمىن»، - دەيدى ن. جۇنىسبايەۆ.
ونىڭ ايتۋىنشا، قىسقى وليمپيادا ويىندارىندا ءبىز ءۇمىت ارتاتىن سپورتشىلار ساناۋلى عانا.
«وسى مەن اتاعان سپورتشىلار اراسىنان ەكى-ءۇش مەدال الىپ جاتسا دا، جامان بولماس ەدى. ءبىراق، كەيدە، اياق-استىنان ايىمىز وڭىنان تۋىپ كۇتپەگەن مەدالدار بولۋى دا عاجاپ ەمەس. ونداي ساتتىلىك بولىپ جاتسا، نۇر ۇستىنە نۇر بولار ەدى. ءوز باسىم مىناۋ چەمپيون بولادى دەپ ەشكىمنىڭ ماڭدايىنان شەرتىپ ايتا المايمىن، جۇلدەگەر اتانىپ جاتسا دا ۇلكەن جەتىستىك بولار ەدى»، - دەپ اتاپ ءوتتى نەسىپ جۇنىسبايەۆ.
اۆتور: كۇنسۇلتان وتارباي
