بەيبىت شۇمەنوۆ كاسىپقوي بوكسقا قايتا ورالدى

ايتا كەتەيىك، 2017-جىلدىڭ ءساۋىر ايىندا شۇمەنوۆ پەن كۋبالىق يۋنيەرۋ دورتيكوس (21-0, 20 ك و) ءوزارا كەزدەسۋ وتكىزۋى كەرەك بولاتىن. الايدا قازاقستاندىق بوكسشىنىڭ جاراقات الىپ قالۋىنا بايلانىستى كەزدەسۋ كەيىنگە قالدىرىلدى. ماۋسىم ايىندا بەيبىت شۇمەنوۆ ءبىرىنشى اۋىر سالماقتاعى WBA چەمپيوندىق تيتۋلدان باس تارتىپ، كوزىنىڭ جاراقاتىنا بايلانىستى بوكستان كەتەتىنىن مالىمدەدى.

بۇگىن استانادا وتكەن باسپا ءسوز ءماسليحاتىندا بوكسشى نە سەبەپتى ۇلكەن سپورتتاعى مانسابىن اياقتاۋ تۋرالى مالىمدەمە جاساعانىن ءتۇسىندىردى.

«سول كەزدەرى مەنەدجەرىممەن قيىندىقتار تۋىندادى، ول ءوز جۇمىستارىنان بوساي المادى جانە ماعان قاجەتتى ايقاس ۇيىمداستىرمادى. سول سەبەپتى ءبىر ورىندا تۇرىپ قالدىم. ونىڭ ۇستىنە كوزىمنەن جاراقات الىپ، ەكى رەت وتا جاساتتىم. وسىلايشا جينالىپ قالعان ەموتسيالىق كۇيزەلىستەردەن مانسابىمدى اياقتايمىن دەپ شەشتىم. شىن مانىندە ماعان ۇزاق ءۇزىلىس كەرەك ەدى. قازىر ءوزىمدى جاقسى سەزىنەمىن، قالپىما كەلدىم جانە مانسابىمدى ءارى قاراي جالعاستىرعىم كەلەدى. بۇگىن كاسىبي بوكسقا قايتا ورالعانىمدى رەسمي تۇردە مالىمدەيمىن»، - دەدى بەيبىت شۇمەنوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

بەيبىت شۇمەنوۆ ا ق ش- تىڭ لاس- ۆەگاس قالاسىندا پروموۋتەرلىك ليتسەنزياسى بار جالعىز شەتەلدىك بوكسشى. ونىڭ KZ Event Productions, Inc. پروموۋتەرلىك كومپانياسىنىڭ Showtime, ESPN، Fox Sports Network, NBC Sports كانالدارىمەن الدىن الا كەلىسىمدەرى بار. بوكسشى وسىنداي مۇمكىندىكتەردى پايدالانا وتىرىپ، ول ءوزىنىڭ كاسىبي مانسابىن جالعاستىراتىنىن جانە وتاندىق بوكسشىلاردىڭ قازاقستاندا عانا ەمەس، الەمدە تانىلۋى ءۇشىن قولداۋ بىلدىرەتىنىن ايتتى.

بوكسشى كەلەسى قارسىلاسىنىڭ ەسىمى ازىرگە بەلگىسىز ەكەنىن، ءبىراق كەلىسسوزدەر جۇرگىزىلىپ جاتقانىن ايتتى جانە قازاق بالالارى ءۇشىن بوكس مەكتەبىن اشۋدى جوسپارلاپ وتىرعانىن جەتكىزدى.

اۆتور: ايجان سەرىكجان قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى