ءدىن تۋرالى زاڭ جوباسى: بالالاردى قورعاۋعا ەرەكشە ەكپىن قويىلعان
ايتا كەتەيىك، بۇگىن پارلامەنت ماجىلىسىندە «ق ر كەيبىر زاڭنامالىق اكتىلەرىنە ءدىني قىزمەت جانە ءدىني بىرلەستىكتەر ماسەلەلەرى بويىنشا وزگەرىستەر مەن تولىقتىرۋلار ەنگىزۋ» تۋرالى زاڭ جوباسى تانىستىرىلدى. وسى ورايدا قۇجاتتا العاش رەت «دەسترۋكتيۆتى ءدىني اعىم» جانە «ءدىني راديكاليزم» سياقتى ۇعىمداردىڭ زاڭدى انىقتاماسى ەنگىزىلىپ وتىر.
«جالپى، زاڭ جوباسى وتە ماڭىزدى. ونى تالقىلاۋ بارىسىندا وزەكتى ماسەلەلەر كوتەرىلدى. ءبىر جاعىنان الىپ قاراعاندا، بۇل تۇزەتۋلەر ءبىزدىڭ ىرگەلى قۇقىقتارىمىزدى جۇزەگە اسىرۋعا، ەكىنشى جاعىنان ولار ەلىمىزدەگى ءدىني تۇراقتىلىقتى قامتاماسىز ەتۋگە قىزمەت ەتەتىن بولادى. اتاپ ايتقاندا، قۇجاتتاعى نەگىزگى نورمالاردىڭ اراسىنان ءبىزدىڭ بالالارىمىزدىڭ قۇقىقتارىن قامتاماسىز ەتەتىن ەرەجەلەردى كۇشەيتۋ وتە ماڭىزدى بولىپ وتىر. دەسترۋكتيۆتى ءدىني ۇيىمداردان بالالاردى قورعاۋ اسا وزەكتى ماقساتتاردىڭ ءبىرى جانە زاڭ جوباسىندا بۇل ماسەلە بولەك نورمامەن قاراستىرىلعان»، - دەپ ءتۇسىندىردى ماۋلەن اشىمبايەۆ.
سونىمەن قاتار دەپۋتات زاڭ جوباسىندا ەسكەرىلىپ وتىرعان جاڭا تۇزەتۋلەر ارقىلى ەندى قازاقستاندا بازالىق ءدىني ءبىلىم العاندار عانا شەتەلگە بارىپ ءدىني وقۋىن جالعاستىرا الاتىنىن اتاپ ءوتتى.
«زاڭ جوباسى كوپتەگەن ازاماتتاردىڭ مۇددەلەرىنە قاتىستى بولعاندىقتان، ماجىلىستە ونىمەن جۇمىس اشىق تۇردە جۇرگىزىلەدى. وسى ورايدا ءدىني بىرلەستىكتەردىڭ، ۇكىمەتتىك ەمەس ۇيىمداردىڭ، ساراپشىلاردىڭ ۇسىنىستارى قاراستىرىلاتىن بولادى»، - دەدى ماۋلەن اشىمبايەۆ.
اۆتور: رۋسلان عابباسوۆ
