قىتايلىق ازامات قازاقستاندا جالعان ديپلوممەن جۇمىس ىستەگەن
سوت ماتەريالدارىنا سايكەس، ت. ەسىمدى ازامات قازاقستانعا جۇمىس ىستەۋگە كەلگەن. ال رۇقسات قاعازدارى ينجەنەر ماماندىعى تۋرالى جالعان ديپلومداردىڭ نەگىزىندە جاسالعان بولىپ شىقتى. قازاقستان تەرريتورياسىندا جۇمىس ىستەۋگە رۇقسات العاننان كەيىن ول شىمكەنت قالاسىنداعى مۇناي كومپانياسىنا قارا جۇمىسشى بولىپ قىزمەتكە تۇرعان. وسى ۋاقىتقا دەيىن سول جەردە جۇمىس ىستەپ كەلگەن.
«استانا قالاسىنىڭ ماماندىرىلعان اۋدانارالىق اكىمشىلىك سوتىنىڭ قاۋلىسىنا سايكەس، ت. ەسىمدى ازامات اكىمشىلىك قۇقىق بۇزۋشىلىق تۋرالى كودەكستىڭ 517-بابى، 5-بولىگى بويىنشا كىنالى دەپ تانىلىپ، قازاقستان اۋماعىنان شىعارۋ جازاسىنا كەسىلدى. سوت شەشىمى كۇشىنە ەندى»، - دەلىنگەن سوتتىڭ رەسمي حابارلاماسىندا.
اۆتور: ارمان اسقاروۆ
