مينيستر ەرتەگى ايتقانداي بولدى - نۇرتاي سابيليانوۆ ەلجان ءبىرتانوۆتىڭ بايانداماسىنا وراي
«ءمينيستردىڭ بايانداماسىن تىڭدادىق. ماعان مينيستر ەرتەگى ايتىپ جاتقان سياقتى بولدى. نەگە؟ ويتكەنى، سيفرلاندىرۋ بولۋ ءۇشىن دەنساۋلىق ساقتاۋ ۇيىمدارىن، اۋرۋحانالاردى، ەمحانالاردى ءبىز جاقسى، جوعارى ينتەرنەت بايلانىسىنا قوسۋىمىز كەرەك. اقپارات جانە كوممۋنيكاتسيالار مينيسترلىگىنىڭ دەرەگىنشە، ول 2022 -جىلى عانا جۇزەگە اسادى، قاراجات بولسا. سوندا بۇل سيفرلاندىرۋ كىمگە جۇرگىزىلەدى؟ مىسالى وڭىرلەردى الىپ قارايتىن بولساق، سولتۇستىك قازاقستان، اقمولا، قوستاناي، اقتوبە، شىعىس قازاقستان، قاراعاندى، وڭتۇستىك قازاقستان وبلىستارىنىڭ دەنساۋلىق ساقتاۋ ۇيىمدارى بار- جوعى 14 پەن 43 پايىز دەڭگەيىندە عانا ينتەرنەت جەلىسىنە قوسىلعان ەكەن. سوندىقتان ءبىرىنشى كەزەكتە وسىنى شەشۋىمىز كەرەك. قۇرمەتتى مينيستر! سىزگە ايتارىم اسپانعا قاراپ، جۇلدىزدى ساناعاننان گورى جەردەگى تىرشىلىككە دۇرىس كوزبەن قاراعان ءجون سەكىلدى»، - دەدى دەپۋتات اتالعان ماسەلە بويىنشا بايانداما جاساعان دەنساۋلىق ساقتاۋ ءمينيسترى ەلجان ءبىرتانوۆقا قاراتا.
ويتكەنى، دەپۋتاتتىڭ ايتۋىنشا، ەلدى مەكەندەردى ارالاعان كەزدە دەنساۋلىق ساقتاۋ سالاسىنا بايلانىستى كوپتەگەن ماسەلەلەر كوتەرىلگەن. ماسەلەن، اۋداندارداعى، اۋىلدارداعى مەديتسينالىق مەكەمەلەردى جاڭا جەدەل جاردەم كولىكتەرمەن قامتاماسىز ەتۋ قاجەت. ەلىمىزدە 2124 جەدەل جاردەم كولىگى بولسا سونىڭ 770- ءسى ەسكىرگەن. 20- عاسىردا شىعارىلعان كولىكتەر دە بار.
«ەندى ويلاپ قاراڭىز، قاتتى ايازدا، بوراندا ەسكى كولىكپەن اۋرۋلاردى الىپ كەلە جاتقاندا بۇزىلىپ قالسا نە بولماق؟ وسى جاعىنا نەگە كوڭىل اۋدارمايسىزدار؟ . سىزدەر اتقارۋشى ورگان، اكىمدەر الىپ بەرۋى كەرەك دەيسىزدەر. ءبىراق قاراجاتتى ءبارىبىر دە رەسپۋبليكالىق بيۋدجەتتەن ءبولۋ كەرەك. سوندا عانا ءبىز دۇرىس مەديتسينالىق كومەك كورسەتە الامىز»، - دەدى ول.
سونىمەن قاتار ول اۋرۋحانالار مەن ەمحانالاردىڭ جاعدايىن دا كوتەردى.
«حالىققا قولايلى جاعداي جاسالماعان، ەسكى، توزعان، جوندەۋ جۇمىستارى جۇرگىزىلمەگەن. اتاپ ايتار بولسام، ش ق و، جارما اۋدانىنىڭ ورتالىعى قالباتاۋ اۋىلىنداعى اۋرۋحانانىڭ جوندەلمەگەنىنە 25 جىل بولىپتى. ءۇرجار اۋدانىنىڭ ورتالىعىندا ەمحانا جوق. ءۇش دارىگەرلىك امبۋلاتوريا قىزمەت كورسەتەدى. ونىڭ ءوزىنىڭ ءبىرىنىڭ عيماراتىن الىپ العانسىزدار. وسىنداي ماسەلەلەر قاي ۋاقىتتا شەشىلەدى؟ زايسان اۋدانى، ەلىمىزدىڭ شەكاراسىنىڭ شەتىندەگى اۋدان. وتكەن جولى بارىپ ەمحاناسىن كوردىم، تار، بۇرىنعى بالاباقشا عيماراتىندا ورنالاسقان. ىشىندە نە سۋى جوق، كارىز جۇيەسى جوق. ادامدار تۇرىپ تۇر، شەشىنەتىن جەرى دە جوق. وسىدان كەيىن مەديتسينالىق كومەكتىڭ جوعارى دەڭگەيدە ەكەندىگىن قالاي ايتۋعا بولادى؟ وسى ماسەلەلەردى شەشەتىن ۋاقىت بولدى عوي»، - دەدى نۇرتاي ءسابيليانوۆ.
دەپۋتات اۋداندارداعى، اۋىلدارداعى كادر تاپشىلىعىنا دا ەرەكشە توقتالدى.
اۆتور: مارلان جيەمباي
