اۋىل اكىمى ەنەسىنىڭ تويحاناسىن بيۋدجەت ەسەبىنەن جىلىتىپ كەلگەن
ول ەكى جىلدان بەرى عيماراتتىڭ جىلۋ اقىسىن مەملەكەت ەسەبىنەن جاۋىپ وتىرعان. اتالعان ىسكە بايلانىستى وبلىستىق مەملەكەتتىك قىزمەت ىستەرى جانە سىبايلاس جەمقورلىققا قارسى ءىس قيمىل دەپارتامەنتىنىڭ ماماندارى تەكسەرۋ جۇمىستىرىن جۇرگىزدى. تەكسەرىس ناتيجەسىن ادەپ جونىندەگى كەڭەس وتىرىسىندا دەپارتامەنتتىڭ وكىلى باقتيار ماكەيەۆ مالىمدەدى.
«تويحانا شەكەر تولەپبەرگەنوۆانىڭ ەنەسى بولىپ كەلەتىن كاسىپكەر احمەتوۆاعا تيەسىلى ەكەندىگى انىقتالدى. 2015-2017 -جىلدار ارالىعىندا وكرۋگ اكىمى تويحانا يەسىمەن كوممۋنالدىق قىزمەتتەردى ۇسىنۋ جونىندە كەلىسىمشارت جاساسپاعان»، - دەدى باقتيار ماكەيەۆ.
تويحانا زالى اكىمدىك عيماراتىندا ورنالاسقان جانە ونىڭ اۋماعى 353 شارشى مەتردى قۇرايدى. كاسىپكەر اكىمشىلىك عيماراتتىڭ ءبىر بولىگىن 10 جىلعا سەنىمگەرلىك باسقارۋ نەگىزىندە العان. 2015 -جىلى عيماراتقا بيۋدجەت قارجىسىنان جىلىتۋ قازاندىعى سالىندى. اكىمنىڭ ەنەسى وعان زاڭسىز تۇردە قوسىلىپ وتىر.
مەملەكەتتىك قىزمەت ىستەرى جانە سىبايلاس جەمقورلىققا قارسى ءىس قيمىل دەپارتامەنتىنىڭ باسشىسى جاندوس سارسەنوۆتىڭ توراعالىعىمەن وتكەن ادەپ جونىندەگى كەڭەس مۇشەلەرى اۋىل اكىمىنىڭ جەمقورلىق ارەكەتىن قاتاڭ سىنعا الدى.
جيىنعا قاتىسقان اۋىل شەنەۋنىگى ءوز كىناسىن تولىق مويىندايتىنىن مالىمدەپ، ءوز قىزمەتىندە قالدىرۋىن ءوتىندى. شەكەر تولەپبەرگەنوۆانى قىزمەتىنە تولىق سايكەس ەمەس دەپ تانۋ تۇرىندەگى جاۋاپكەرشىلىككە تارتۋ ءۇشىن جوعارى تۇرعان باسشىلىق، ناقتى ايتقاندا اقتوعاي اۋدانىنىڭ اكىمىنە ۇسىنىس جولداۋ ءبىراۋىزدان ۇيعارىلدى.
قازىر بيۋدجەتكە كەلتىرىلگەن شىعىننىڭ كولەمى ەسەپتەلىپ جاتىر. ەندى كاسىپكەرگە بارلىق شىعىندى وتەۋگە تۋرا كەلەدى.
