بولاشاق دارىگەرلەر وڭىرلەردە جۇمىس ىستەۋگە مىندەتتىلۋى مۇمكىن
بۇل تۋرالى بۇگىن ق ر پارلامەنتى ماجىلىسىندە دەنساۋلىق ساقتاۋ سالاسىن سيفرلاندىرۋ تاقىرىبىندا وتكەن ۇكىمەت ساعاتىندا ەلىمىزدىڭ دەنساۋلىق ساقتاۋ ءمينيسترى ەلجان ءبىرتانوۆ ايتتى، دەپ حابارلايدى قازاقپارات.
شارا بارىسىندا ءماجىلىس دەپۋتاتى ارمان قوجاحمەتوۆ شاعىن قالالاردى مەديتسينالىق كادرلارمەن قامتاماسىز ەتۋدەگى پروبلەمانى كوتەردى.
«جاستار ول جاققا بارمايدى. وسى پروبلەمانىڭ اياسىندا سوڭعى ۋاقىتتاردا جاس مامانداردىڭ وزدەرىنىڭ پاسيەنتتەرىنەن دە قورقاتىن تەندەنسيا بايقالادى. وسى رەتتە دەنساۋلىق ساقتاۋ مەن ءبىلىم جانە عىلىم مينيسترلىكتەرى اتالعان پروبلەمانى شەشۋ ءۇشىن قانداي جوسپارى بار؟»، - دەپ سۇرادى ول ەلجان ءبىرتانوۆتان.
اتالعان ماسەلە بويىنشا ءسوز العان دەنساۋلىق ساقتاۋ ءمينيسترى اۋىلدىق ەلدى مەكەندەردىڭ ەمحانالارىنا تاپشى ماماندىقتاردى جەدەل وقىتۋعا باعىتتالعان ءبىرقاتار شارانىڭ وتكەن جىلى قابىلدانعانىن ەسكە سالدى.
«جالپى تاجىريبە دارىگەرلەرىن مىندەتتى تۇردە ءۇش جىلدىق رەزيدەنتۋرادان ءوتۋ قاجەتتىلىگىن الىپ تاستادىق. ياعني، ولار ينتەرناتۋرادان كەيىن بىردەن جۇمىس ىستەي الادى. وسىنداي ءبىرقاتار ماماندىق بويىنشا جەدەل قايتا دايىندىقتان ءوتۋ مۇمكىندىگىن بەردىك»، - دەدى ول.
سونىمەن قاتار مينيستر مەملەكەت تەگىن وقۋ ءۇشىن گرانتتاردى جەتكىلىكتى دەڭگەيدە ءبولىپ وتىرعانىن، الايدا ءبىلىم العاندارعا جاۋاپكەرشىلىك جۇكتەلمەگەندىكتەن بارلىعى قالادا جۇمىس ىستەۋگە تىرىساتىندىعىن ايتتى.
«سونىقتان قازىرگى ۋاقىتتا بۇل ماسەلەنى جاڭا كودەكس اياسىندا تالقىلاۋعا شىعارامىز. دەنساۋلىق ساقتاۋ سالاسىندا وتكەنگە ورالۋ ماسەلەسىن كوتەرمەكپىز. ياعني، ەگەر ادام مەملەكەت قولداۋىمەن ءبىلىم الاتىن بولسا، وندا ول بەلگىلى ءبىر ۋاقىت مەملەكەتتىك كوميسسيا كادر تاپشىلىعىن جويۋ ءۇشىن قايدا جىبەرسە سوندا جۇمىس ىستەۋى ءتيىس»، - دەدى ەلجان ءبىرتانوۆ.
ال ءبىلىم جانە عىلىم مينيسترلىگىنىڭ جاۋاپتى حاتشىسى ارىن ورسارييەۆ قازىرگى ۋاقىتتا جۇمىس توبى ءىرى وڭىرلىك جوعارى وقۋ ورىندارى بازاسىندا مەديتسينالىق ماماندىقتار، فاكۋلتەتتەر اشۋ مۇمكىنشىلىگىن زەردەلەپ جاتقانىن ايتتى.
اۆتور: مارلان جيەمباي
