ماعجان جۇمابايەۆ جىلى: انكارا اقىندى ۇلىقتادى

قازاق حالقىنىڭ ۇلى اقىنى ماعجان جۇمابايەۆتىڭ 125 جىلدىق مەرەيتويىنا وراي، تۇركى الەمىندە 2018 -جىل «ماعجان جۇمابايەۆ جىلى» بولىپ جاريالانعان ەدى.

ەۋرازيا جازۋشىلار وداعى ۇيىمداستىرعان «ماعجان جۇمابايەۆتىڭ ءومىرى مەن شىعارماشىلىعى» اتتى تانىمدىق ءدارىس- كونفەرەنسيانىڭ نەگىزگى بايانداماشىسى ع ا ز ي ۋنيۆەرسيتەتىنىڭ دوتسەنتى فەرحات تامير بولدى.

فەرحات تامير - تاۋەلسىزدىك تاڭىندا ماعجان جۇمابايەۆ شىعارماشىلىعى تۋرالى تۇركيادا ەڭ العاش عىلىمي ەڭبەك جازىپ، 1993 -جىلى اقىننىڭ ولەڭدەرىن تۇرىك تىلىنە اۋدارعان عالىم. ول جيىرما بەس جىلدان استام ۋاقىت بويى تۋىسقان تۇرىك ەلىندە ماعجان شىعارمالارىن ناسيحاتتاۋمەن اينالىسىپ كەلەدى.

جيىندى ماعجان اقىننىڭ بۇكىل تۇركى حالىقتارى پوەزياسىنا قوسقان ۇلەسى تۋرالى كىرىسپە سوزىمەن اشقان ەۋرازيا جازۋشىلار وداعىنىڭ ءتوراعاسى ياكۋپ ومەروعلى، اقىن ولەڭدەرىنىڭ تۋىستاس حالىقتاردىڭ تاريحىنداعى ەرەكشە قىزمەتىن اتاپ ءوتتى. نەگىزگى باياندامانى جاساعان فەرحات تامير تۇرىك وقىرمانىنا ماعجاننىڭ ءومىرى مەن شىعارماشىلىعى تۋرالى قىزىقتى دەرەكتەر ۇسىنىپ، بىرنەشە ولەڭىنە عىلىمي تالداۋلار جاسادى.

 «الاش» پارتياسىنىڭ قايراتكەرلەرى مەن ماعجاننىڭ رۋحاني بايلانىسىن تارازىلاي كەلىپ، «ءجۇز جىل بۇرىنعى قازاق پوەزياسىندا ماعجانداي قۋاتتى، ۇلتشىل، ليريك اقىن بولعان جوق»، - دەدى ول.

جيىن سوڭىندا تۇركسوي حالىقارالىق ۇيىمىنداعى ق ر م س م وكىلى اسقار تۇرعانبايەۆ قۇتتىقتاۋ ءسوز سويلەپ، اقىن ءالي اكباش تۇرىكشەگە ءوزى اۋدارعان ماعجان ولەڭدەرىن وقىدى.

ايتا كەتەيىك، 2018 -جىلدى «ماعجان جۇمابايەۆ جىلى» ەتىپ جاريالاعان تۇركسوي حالىقارالىق ۇيىمى تۇركى تىلدەس ەلدەردە اقىن مەرەيتويىن كەڭ كولەمدە اتاپ ءوتۋدى جوسپارلاپ وتىر. اقپان ايىنىڭ 16-20 - كۇندەرى تۇركيانىڭ كاستامونۋ، انكارا قالالارىندا اقىننىڭ تۋعان ولكەسىنەن كەلەتىن دەلەگاتسيانىڭ قاتىسۋىمەن «ماعجان جىلىنىڭ» اشىلۋ سالتاناتى وتەدى دەپ جوسپارلانۋدا.

اۆتور: ريزابەك نۇسىپبەك ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى