جۇمىس ىستەمەگەنىڭ ءۇشىن دە سالىق تولەيسىڭ نەمەسە جاتىپىشەرلەردىڭ دەرەك بازاسى جاسالادى
بۇل جايىندا اتالعان ەلدىڭ ەڭبەك جانە الەۋمەتتىك قورعاۋ ءمينيسترنىڭى ورىنباسارى اندرەي لوبوۆيچ ءمالىم ەتتى. سونداي-اق، ءمينيستردىڭ ورىنباسارى اتالمىش دەرەك بازاسى ەكى كەزەڭدە تۇزىلەتىنىن جەتكىزدى.
«رەسپۋبليكالىق دەڭگەيدە رەسپۋبليكالىق اقپارات رەسۋرستارى نەگىزىندە نەگىزگى بازا جاسالادى. ال جەرگىلىكتى دەڭگەيدە قولداعى اقپارات رەسۋرستارى مەن اقپاراتتى ەسكەرە وتىرىپ، نەگىزگى مالىمەتتەر بازاسىنا تۇزەتۋلەر جۇرگىزىلەتىن بولادى»، - دەدى ول.
ءمينيستردىڭ ورىنباسارى وسىلاي دەي كەلە مالىمەتتەر بازاسىن ازاماتتارعا جۇمىس تاۋىپ بەرۋ ماسەلەسىن شەشۋ ءۇشىن پايدالانىلۋعا بولاتىنىن تىلگە تيەك ەتتى. ايتا كەتۋ كەرەك، اعىمداعى جىلدىڭ قاڭتار ايىنىڭ 25- كۇنى بەلورۋس پرەزيدەنتى الەكساندر لۋكاشەنكو ەڭبەككە قابىلەتتى ازاماتتارعا مەملەكەت تاراپىنان قارجى ءبولۋدى توقتاتۋدى قاراستىراتىن №1 -دەكرەتكە قول قويعان ەدى.
كەلەسى جىلدىڭ باس كەزىنەن، دالىرەگى، 2019 -جىلدىڭ قاڭتار ايىنىڭ 1 نەن باستاپ، جۇمىس ىستەمەيتىن ەڭبەككە قابىلەتتى ەل تۇرعىندارى مەملەكەت قارجىلاندىراتىن قىزمەتتەردىڭ اقىسىن تولىق تولەيتىن بولادى.
تاعى ءبىر ايتا كەتەتىنى، 2015 -جىلدىڭ ءساۋىر ايىندا ەل پرەزيدەنتى الەكساندر لۋكاشەنكو «ارامتاماقتارعا سالىناتىن سالىق» قۇجاتىنا قولىن قويعان ەدى. اتالمىش قۇجاتتاعى تالاپ بويىنشا ەڭبەككە جارامدى بولا تۇرا التى اي بويى جۇمىس ىستەمەگەن ءارى سالىق تولەمەگەن ەل تۇرعىندارى جىل سايىن 250 دوللار شاماسىندا مەملەكەتكە تولەم تولەۋى ءتيىس. 2017 -جىلدىڭ اقپان ايىندا بەلگىلى بولعانداي، 470 مىڭ ادامنان 46 مىڭدايى عانا تولەم تولەگەن ەكەن. بۇل سالىق ەل اۋماعىندا نارازىلىق اكسيالارىن تۋدىردى.
