كاسىپكەرلەر ماماندىعى جوق جاستاردى كاسىپ تۇرىنە ۇيرەتەدى

وتكەن جىلى اشىلعان ورتالىقتا جەتىمدەر ۇيىندە تاربيەلەنگەن جاستار تۇرادى. وبلىستىق كاسىپكەرلەر پالاتاسى ماماندىعى جوق جاستاردى كاسىپ تۇرىنە ۇيرەتەدى. مىسالى 3 جىگىت قالاداعى ەڭ ءىرى اياق كيىم شەبەرحاناسىندا تاجىريبەدەن ءوتىپ جاتىر.

وسىدان كەيىن ولار جۇمىسقا ورنالاسادى. ەرىنبەگەن ەتىكشى بولادى. يۆان ديەۆياتوۆ تاجىريبەلى ەتىكشىنىڭ ايتقانىن مۇقيات تىڭداپ، ۇيرەتكەنىن قاعىپ الۋعا تىرىسادى. كاسىپتى مەڭگەرۋ ءۇشىن ولارعا 1 اي مەرزىم بەرىلگەن. ايتۋىنشا، اياق كيىم جوندەۋ - اسقان شىدامدىلىقتى تالاپ ەتەتىن جۇمىس. قالاداعى ەڭ ءىرى شەبەرحانادا تاجىريبەدەن ءوتۋ ءۇشىن بار جاعداي جاسالعان. باستىسى، ۇيرەنۋگە دەگەن ىنتا بولسا، بولعانى. كاسىپتى مەڭگەرگەننەن كەيىن «مەيىرىم» ورتالىعىنداعى اياق- كيىم جوندەۋ شەبەرحاناسىنا جۇمىسقا تۇرماق.

يۆان ديەۆياتوۆ، «مەيىرىم» الەۋمەتتىك بەيىمدەۋ ورتالىعىنىڭ تۇرعىنى:

- اياق كيىم جوندەۋمەن اينالىسامىن دەپ شەشتىم. سەبەبى، ءبىزدىڭ ورتالىقتا شەبەرحانا بار، ءبىراق، شەبەرلەر جوق. ەتىكشىلىك كاسىبى ەڭبەكقورلىقتى، تاباندىلىقتى تالاپ ەتەدى. ال مەنىڭ بويىمدا بۇل قاسيەتتەر بار. سوندىقتان مەنەن جاقسى ەتىكشى شىعادى دەپ ويلايمىن. قىزىعۋشىلىعىم بار. قامقورشىسى جوق جاستارعا كومەك بەرىپ، كاسىپكە باۋلۋدى قولعا العان كاسىپكەردىڭ ءوزى كەزىندە ەتىكشى بولعان. 30 جىل بۇرىن اعاسىنان ۇيرەنگەن كاسىبىنەن ءناسىپ تاۋىپ، بۇگىندە قالا بويىنشا شەبەرحانالار جەلىسىن اشتى. كەز كەلگەن اياق كيىمدى جوندەي الاتىن شەبەرلەرى بار. قاجەتتى جابدىقتار مەن ساپالى ماتەريالداردى شەتەلدەردەن الدىرادى. كاسىپكەر جەتىم كورسە، جەبەپ جۇرەتىنىن ايتادى. بۇگىن ءوزى ۇيرەتكەن شاكىرتتەرى بولاشاقتا جەكە كاسىبىن اشۋى ابدەن مۇمكىن.

ايتقالي تاقاۋيەۆ، كاسىپكەر: - ەگەر ولار ءوز بەتتەرىنشە جۇمىس جاساپ، شەبەرحانا اشاتىن بولسا، مەن العاشقى ۋاقىتتا ماتەريالدارمەن قامتاماسىز ەتۋگە دايىنمىن. اياقتان تۇرىپ كەتكەنشە قولداۋ كورسەتە الامىن. كەيىن جەلىم، رەزەڭكە، بىلعارى، ءجىپ سياقتى قاجەتتى ماتەريالداردى ارزان باعامەن الۋعا كومەكتەسەمىن. ەڭ باستىسى، ولار ەڭبەك ەتىپ، ەكى قولعا ءبىر جۇمىس تاپسا بولعانى.

وبلىستىق كاسىپكەرلەر پالاتاسى جاستاردى باسقا دا كاسىپ تۇرلەرىنە ۇيرەتپەكشى. سوندىقتان ءىسى وڭعا باسقان كاسىپكەرلەردەن قولداۋ كۇتەدى.

گۇلميرا قازمۇحامبەتوۆا، وبلىستىق كاسىپكەرلەر پالاتاسىنىڭ ساراپشى مامانى: - اسەمدىك، تىگىن سالوندارى بار بارلىق كاسىپكەردى جانە جەكە قوجالىقتاردى ءبىز وسى بالالاردى الىپ، وقىتۋعا شاقىرامىز. الەۋمەتتىك كومەك بەرۋگە شاقىرامىز. ياعني، اقشالاي تالاپ ەتىپ وتىرعان جوقپىز. تەك وقىتۋ جاعىنان. وسى بالالاردى وقىتىپ بەرسە ەكەن. «مەيىرىم» الەۋمەتتىك بەيىمدەۋ ورتالىعىندا 103 تۇرعىن بار. ولاردىڭ 63 ى ءالى مەملەكەت قامقورلىعىندا. قالعاندارى -  جۇمىسقا قابىلەتتى جاستار. ورتالىقتا سۇلۋلىق سالونى، 2 جىلىجاي مەن اياق-كيىم جوندەۋ شەبەرحاناسى اشىلعان. وندا وسى ءۇي تۇرعىندارى ەڭبەك ەتەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى