قازاقستان دەنساۋلىق ساقتاۋ ءمينيسترى نەگە الاڭداۋلى؟

بۇل تۋرالى بۇگىن ق ر پارلامەنتى ماجىلىسىندە دەنساۋلىق ساقتاۋ سالاسىن سيفرلاندىرۋ تاقىرىبىندا وتكەن ۇكىمەت ساعاتىندا ەلىمىزدىڭ دەنساۋلىق ساقتاۋ ءمينيسترى ەلجان ءبىرتانوۆ ايتتى، دەپ حابارلايدى قازاقپارات.

ءمينيستردىڭ اتاپ وتۋىنشە، وڭىرلەردە مەديتسينالىق اقپاراتتىق جۇيەلەردى ەنگىزۋ بويىنشا قارقىندى جۇمىس جۇرگىزىلۋدە. دەنساۋلىق ساقتاۋ ۇيىمدارىن كومپيۋتەرلىك تەحنيكالارمەن جابدىقتاۋ، ولاردىڭ ينتەرنەت جەلىسىنە قولجەتىمدىلىگىن قامتاماسىز ەتۋ باعىتىندا دا وڭ ديناميكا بايقالادى.

«بۇگىنگى كۇنى دەنساۋلىق ساقتاۋ ۇيىمدارىندا مەديتسينالىق اقپاراتتىق جۇيەلەردى ەنگىزۋ ۇلەسى 75,5 پايىزدى قۇرايدى. 2019-جىلدىڭ 1- قاڭتارىندا بۇل كورسەتكىشتى 100 پايىزعا جەتكىزۋ جوسپارلانىپ وتىر. دارىگەرلەر مەن ورتا مەديتسينالىق قىزمەتكەرلەردى كومپيۋتەرلىك تەحنيكالارمەن قامتاماسىز ەتۋ 82,7 پايىزدى قۇرايدى. ال دەنساۋلىق ساقتاۋ ۇيىمىنىڭ 55,7 پايىزىنا ينتەرنەت جەلىسى قولجەتىمدى. 2019-جىلدىڭ 1- قاڭتارىندا بۇل كورسەتكىشتى 100 پايىزعا جەتكىزەمىز دەپ جوسپارلاپ وتىرمىز. ءبىراق، تەك قانا اۋداندىق دەڭگەيدە»، - دەدى ول.

ونىڭ ايتۋىنشا، اكىمدىكتەردىڭ دەرەكتەرىنە سايكەس 2018-جىلدىڭ 1- توقسانىنىڭ سوڭىنا دەيىن مەديتسينالىق اقپاراتتىق جۇيەنى پاۆلودار، ماڭعىستاۋ، جامبىل وبلىستارىنىڭ 90 پايىزدان استام دەنساۋلىق ساقتاۋ ۇيىمىنا ەنگىزۋ جوسپارلانعان.

«بۇل رەتتە شىعىس قازاقستان، اقتوبە، الماتى وبلىستارىندا جانە استانا قالاسىنداعى مەديتسينالىق اقپاراتتىق جۇيەلەرىن ەنگىزۋ ديناميكاسىنىڭ تومەن بولۋى الاڭداتىپ وتىر»، - دەدى ەلجان ءبىرتانوۆ.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى