داۋرەن ابايەۆ: سيفرلاندىرۋ - اۋىل مەن قالانىڭ الشاقتىعىن قىسقارتادى

«Qazaqstan» ۇلتتىق ارناسىنداعى «Apta»  باعدارلاماسىندا قوناقتا بولعان ق ر اقپارات جانە كوممۋنيكاتسيالار ءمينيسترى داۋرەن ابايەۆ وسىلاي ءمالىم ەتتى، دەپ حابارلايدى «قازاقپارات» ح ا ا ءتىلشىسى.

«ەكسپو-2017» كورمەسىنەن كەيىن نە بولادى دەپ كوپ ادامدار سۇراپ جاتىر عوي. كورمە عيماراتتارىنىڭ ءبىر جاعى قارجى ورتالىعى، ەكىنشى بولىگى وزگە دە ينستيتۋت بولىپ اشىلعالى جاتىر. سونىڭ ءبىر عيماراتىن بىزگە بەردى. ياعني، ءبىز سول جەردە «Astana Hub» دەگەن جاستارعا ارنالعان ارنايى جۇيەلى عيماراتتى بەرەمىز. سول جەردە ءبىزدىڭ مەملەكەتتە ەڭبەك ەتىپ جۇرگەن كومپانيالار تالانتتى جاستاردى تاۋىپ، ءىت سالاسىنا قاتىستى ءونىم كەرەكتىگىن ايتا الادى. سوندا وتىرعان جاستار اتالعان سۇرانىستى قاناعاتتاندىرار دەگەن ويدامىز. «Astana Hub» بيىل اشىلادى»، - دەيدى مينيستر.

داۋرەن ابايەۆ ءوز سوزىندە سيفرلاندىرۋ سالاسىنىڭ ەل ومىرىنە پايدا اكەلەر تۇستارىن ايتىپ بەردى.

«ەكى-ءۇش مىسال كەلتىرەيىن. مىسالى، بىزدە اۋىلدا مالىن سويىپ وتكىزۋگە نيەتتى كىسىلەر كوپ. سول مالدى اۋىل ادامدارى ءۇشىن قالاعا اپارىپ، ساتۋ ماسەلەسى بار. ءبىزدىڭ ەلىمىزدە ءبارى ەلەكتروندى ساۋدانى قولعا الىپ، جۇمىس ىستەسە، ينتەرنەت بولسا الگى اۋىل ادامدارى ۇيىندە وتىرىپ- اق، مالىن ونلاين- بازار ارقىلى ساتا الادى. ودان باسقا اۋىل ادامدارى كەز كەلگەن قۇجاتتى الۋ ءۇشىن اۋدان ورتالىعىنا نەمەسە قالاعا بارادى. ال تىڭ جۇيە ارقىلى ول ادامدار كوپتەگەن انىقتامالاردى ۇيىندە وتىرىپ- اق الا الادى»، - دەيدى داۋرەن ابايەۆ.

ءمينيستردىڭ ايتۋىنشا، جاڭا تەحنولوگيالار ارقىلى دارىگەرلەر ءتىپتى قاشىقتىقتا دا وتا جاساي الادى.

«قازىر استانادا سۋىپ كەتتى دەپ ءبارى ايتىپ جاتىر. كۇن سۋىق بولعاننان كەيىن قۇجاتتار ءۇشىن سوناۋ الىستاعى حقكو- نا بارۋعا تۋرا كەلەدى. ال سيفرلاندىرۋ جۇيەسى ارقىلى ادامدار قاجەتتى انىقتامانى ۇيدە وتىرىپ الا الادى. ودان باسقا اۋدانداردا قيىن وپەراتسيالاردى جۇرگىزۋ مۇمكىندىكتەرى پايدا بولادى. ءبىر جاعىنان الماتىدان، استانادان نەمەسە قاراعاندىدان اۋىلدارعا دارىگەر جەتكىزۋ وڭاي ەمەس. ءساتى تۇسە مە، تۇسپەي مە بەلگىسىز. ونلاين ارقىلى ۆيدەوكامەرالارمەن ەكى دارىگەردىڭ ءبىرى (ەكىنشىسى ناۋقاستىڭ قاسىندا - اۆت. ) الماتىدا قاجەتتى كەڭەس بەرۋ ارقىلى وتانى جۇرگىزە الادى. مىسالى، كۇردەلى وتانى جۇرگىزەتىن 2-3 مامان عانا بولۋى مۇمكىن. ول مامان بۇكىل قازاقستاننىڭ تۇكپىر- تۇكپىرىنە جەتە الماسا دا، ارنايى تەلەەكران ارقىلى وپەراتسياعا كومەگىن كورسەتە الادى»، - دەيدى داۋرەن ابايەۆ.

مينيستر سيفرلاندىرۋ جۇيەسىنىڭ ءبىلىم جۇيەسىنە دە كوپ پايدا اكەلەتىنىن تىلگە تيەك ەتتى.

«ءبىلىم جۇيەسىنە كەلەر بولساق، اۋىلداردا كىتاپ، مامان، مۇعالىم جەتىسپەيدى دەپ جاتادى. سيفرلاندىرۋ سول سۇراقتى دا شەشە الادى دەپ ويلايمىز. ويتكەنى، دۇنيە جۇزىندە ونلاين ساباق بەرۋ تاسىلدەرى وتە جاقسى دامىپ كەلەدى. سوندىقتان، بۇل جەردە دە مۇعالىمدەر دە ونلاين كۋرستاردى جۇرگىزە الادى. سەبەبى، اۋىلدار مەن قالالاردىڭ اراسى الشاقتاپ بارادى دەپ جاتىر عوي. جاڭا تەحنولوگيالار ارقىلى اۋىل مەن قالانى بىرىكتىرە الامىز دەگەن ويدامىز. ەلباسى بىزگە وسىنداي تىكەلەي تاپسىرما بەردى. وسىنىڭ ءبارىن ءبىز زەرتتەپ، پرەزيدەنتتىڭ ءوزى قولداپ، ءبىز 2017 -جىلدىڭ جەلتوقسان ايىندا «سيفرلىق قازاقستان» باعدارلاماسىن قولعا الدىق»، - دەيدى ول.

داۋرەن ابايەۆ ايتىپ وتكەندەي، اتالعان باعدارلاما بويىنشا 2018 -جىلدان باستاپ 120 ءىس- شارانىڭ 20 سى قولعا الىنادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى