ورتالىق ازيا ەلدەرىنىڭ باسشىلارى استانادا باس قوسپاق

СА-portal مالىمەتىنشە، ناۋرىز مەرەكەسى قارساڭىندا استانا قالاسىندا وتەتىن ورتالىق ازيا ەلدەرى باسشىلارىنىڭ سامميتىن ۇيىمداستىرۋعا قازاقستان پرەزيدەنتى نۇرسۇلتان نازاربايەۆ پەن وزبەكستان باسشىسى شاۆكات ميرزيەيەۆ مۇرىندىق بولعان. بەس ەلدىڭ پرەزيدەنتتەرىنىڭ باسىن قوساتىن سامميتتە قازاقستان باسشىسى نۇرسۇلتان نازاربايەۆ ءتوراعالىق ەتەدى.

ەستەرىڭىزگە سالايىق، بۇعان دەيىن نۇرسۇلتان نازاربايەۆ «استانا كلۋبىنىڭ» ءۇشىنشى وتىرىسىندا ورتالىق ازيا ەلدەرى جايىندا مالىمدەمە جاساعان بولاتىن. وندا ول:

«ءبىزدىڭ تاريحىمىز، ءدىنىمىز، مادەنيەتىمىز ءبىر. قۇداي بىزگە ءبىر- بىرىمىزگە كومەكتەسۋگە، ايماق قاۋىپسىزدىگىن قامتاماسىز ەتۋگە، بىرگە بولۋعا جازدى. قازىر وسىعان بايلانىستى وزبەكستاندا كوپتەگەن وزگەرىستەر بولىپ جاتىر. مەن بۇنى سىرتتاي باقىلاپ وتىرمىن. وسى جۇمىستاردىڭ ناتيجەسىندە قازاقستان مەن وزبەكستان اراسىنداعى ساۋدا اينالىمى 30 پايىزعا ءوستى. ەكى ەلدىڭ حالقى ارالاسۋدا. ءبىز قولىمىزدان كەلگەنشە كومەكتەسۋدەمىز. بۇنداي وزگەرىستەر تاجىكستاندا دا، تۇركىمەنستاندا دا جۇرگىزىلۋدە. جاقىندا قىرعىزستاندا پرەزيدەنت سايلاۋى ءوتتى. مەن ورتالىق ازيا بولاشاعىنا ۇلكەن سەنىممەن قارايمىن. ءبىز بىرگە بولۋىمىز كەرەك. ءبىزدى قۇداي قوسقان. بۇل بىرەۋگە قارسى بىرىگۋ ەمەس، بۇل ءبىزدىڭ مەملەكەتتەرىمىزدىڭ دامۋى مەن حالقىمىزدىڭ بولاشاعى ءۇشىن بىرىگۋ» - دەگەن.

 ال وزبەكستان پرەزيدەنتى شاۆكات ميرزيەيەۆ سامارقانت قالاسىندا وتكەن حالىقارالىق كونفەرەنسيادا:

«ورتالىق ازيا ەلدەرىنىڭ تاريحى، ءدىنى، ءداستۇرى ءبىر. ءبىزدىڭ مىڭداعان جىلدىق تاريحىمىز بار. ءبىز ەۋرازيانىڭ جۇرەگىمىز. وزبەكستان ورتالىق ازيانىڭ دامۋى ءۇشىن كورشىلەرىمەن بىرىگىپ جۇمىس ىستەۋگە قاشان دا دايىن. ورتالىق ازياداعى 70 ميلليون حالىقتىڭ بۇگىنى مەن ەرتەڭى ايماقتاعى مەملەكەتتەرگە بايلانىستى» - دەپ مالىمدەگەن.

ەسداۋلەت قىزىربەك ۇلى

qazaqtimes.com

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى