شىمكەنتتە ەلباسى جولداۋىن ناسيحاتتايتىن اقپاراتتىق توپتار قۇرىلاتىن بولدى
بۇل تۋرالى بۇگىن قالالىق اكىمدىك اكتيۆىنىڭ كەڭەيتىلگەن ماجىلىسىندە ايتىلدى، دەپ حابارلايدى قازاقپارات ءتىلشىسى.
ءال فارابي اۋدانى اكىمدىگىندە وتكەن ماجىلىسكە شىمكەنت قالاسىنىڭ اكىمى نۇرلان ساۋرانبايەۆ، قالالىق ءماسليحاتتىڭ حاتشىسى نۇرلان بەكنازاروۆ باستاعان قالا اكتيۆى، شاھارداعى 4 اۋداننىڭ اكىمدەرى مەن ءتۇرلى سالا ارداگەرلەرى، قۇرىلىمدىق بولىمدەردىڭ قىزمەتكەرلەرى مەن مۇعالىمدەر، ب ا ق وكىلدەرى قاتىستى.
ەلباسىنىڭ قازاقستان حالقىنا ارناعان «ءتورتىنشى ونەركاسىپتىك ريەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىن تالقىلاۋعا ارنالعان قالا اكتيۆىنىڭ وتىرىسىندا الدىمەن شاھار اكىمى ءسوز الدى. نۇرلان ەرمەك ۇلى قالالىق اكىمدىك تاراپىنان اتقارىلار جوسپار تۋرالى تولىق باياندادى.
«بيىلعى جولداۋدىڭ ەرەكشەلىگى - «قازاقستان-2050» دامۋ ستراتەگياسىنداعى دامىعان وتىز ەلدىڭ قاتارىنا ەنۋدىڭ العاشقى قادامدارى بەلگىلەندى. دامىعان تەحنولوگيا زامانىندا الەمنىڭ بەت- بەينەسى جەدەل وزگەرۋدە. كەشەگى قيالدا جۇرگەن ارمان- ويلار بۇگىن كۇندەلىكتى ومىرگە ەنۋدە. ەلباسى كىم اقىلىمەن ساناسىپ، ۇتىمدى قيمىلداسا، جەڭىس سونىڭ قولىندا بولاتىنىن اركەز ايتىپ كەلەدى. ول دەگەنىمىز - ارقانى كەڭگە سالماي، ەڭبەك ەتۋدە ەسكى ستەرەوتيپتى قويىپ، رۋحاني جاڭعىرۋدا، ءبىلىمدى دە الەم ەلدەرىمەن باسەكەگە قابىلەتتى ۇلتقا اينالۋعا ۇمتىلا بىلۋدە دەپ تۇسىنەمىن. سوندىقتان ءار ازامات جولداۋدا ايتىلعان مىندەتتەرگە اسا ءمان بەرىپ، ىسكە اسۋىنا ءوز ۇلەسىن قوسۋى قاجەت. ونىڭ نەگىزىندە ۇلتىمىزدىڭ بولاشاعى، حالقىمىزدىڭ جاعدايىن جاقسارتۋ ماقساتى جاتىر. قازاقستاننىڭ قۋاتتى ەلگە اينالۋى - ءاربىر وڭىرگە، وندا اتقارىلىپ جاتقان ىرگەلى ىستەرگە بايلانىستى ەكەنىن ەلباسى شەگەلەپ ايتتى. ونىڭ ىشىندە شىمكەنت قالاسىنىڭ الاتىن ورنى بولەك»، - دەدى نۇرلان ساۋرانبايەۆ.
شاھار اكىمى قالادا قازىردىڭ وزىندە الەۋمەتتىك-ەكونوميكالىق دامۋ اۋقىمى جاعىنان ەلىمىزدەگى ءىرى ءۇش مەگاپوليستىڭ ءبىرى بولىپ تابىلاتىن جەتكىزدى. سوندىقتان جۇكتەلگەن مىندەتتەردى سەزىنە وتىرىپ، جەرگىلىكتى اتقارۋشى ورگاندار اتقاراتىن جۇمىستىڭ باعىتىن ايقىنداپ بەردى.
جيىن بارىسىندا قاتىسۋشىلار ەلباسى جولداۋىنىڭ وتانسۇيگىشتىك پەن ۇلتجاندى قاسيەتتەردى تاربيەلەۋدە دە ماڭىزدى قۇجات ەكەنىن اتاپ ءوتتى. ۇستازدار جاعى بولسا وسكەلەڭ ۇرپاقتىڭ تاربيەسى دامىعان قازاقستاننىڭ بولاشاعى ءۇشىن اسا ماڭىزدى ەكەنىن جەتكىزدى.
ءماجىلىستى قورىتىندىلاعان قالا اكىمى نۇرلان ساۋرانبايەۆ ەلباسى جولداۋىن ناسيحاتتاۋ ماقساتىندا شىمكەنتتە اقپاراتتىق توپتار قۇرىلاتىنىن حابارلادى.
اۆتور: اينۇر اقبايەۆا
