مۇحتار قۇل-مۇحاممەد جاستارعا شەشەندىك ونەر بويىنشا بىرنەشە كەڭەس بەردى

«كوركەم تەلەكوم» ج ش س كونسورسيۋمىنىڭ باسشىسى قايرات احمەتوۆتىڭ «استانا - دامۋ مەن يننوۆاتسيانىڭ 20 جىلى» فورۋمىنداعى بايانداماسىنان كەيىن، مۇحتار قۇل-مۇحاممەد وعان ۇلكەن اۋديتوريا الدىندا قالاي سويلەۋ كەرەكتىگىن ۇيرەتتى.

ايتا كەتەيىك، قايرات احمەتوۆ استاناداعى «سەرگەك» جوباسىنىڭ اۆتورى رەتىندە تانىمال.

«سەن شىنىمەن دە بۇل جۇيە ارقىلى قالا تۇرعىندارىنىڭ سەرگەكتىگىن كۇشەيتتىڭ. الايدا ساعان ايتار ءبىر اقىل-كەڭەسىم بار. مەن ۇلكەن اۋديتوريا الدىندا ءجيى ءسوز سويلەيمىن، وسى ورايدا ساعان ءوزىمنىڭ كەڭەسىمدى بەرگىم كەلەدى. سەنىڭ اتى-ءجونىڭدى جاريالاعاننان كەيىن، مىنبەرگە شىعا بەرگەنىڭدە، زالدا وتىرعاندار العاشقى بەس سەكۋندتا ادامنىڭ سىرتقى كەلبەتىن باعالاپ، كوزبەن شولىپ شىعادى. بۇل رەتتە نەگىزىنەن نازىك جاندىلار وسىنداي باعالاۋدى جۇرگىزەدى. مىنبەرگە كوتەرىلگەن سوڭ، ولار سەنىڭ كيىمىڭە قارايدى. ال ءسوز باستاعان كەزدە، جيىلعان جۇرت سەنىڭ داۋىسىڭدى سكانەرلەپ، داۋىس ىرعاعىن باعالايدى. 20 سەكۋندتان كەيىن ولاردىڭ نازارى باسقا وبەكتىگە اۋادى»، - دەدى مۇحتار قۇل-مۇحاممەد.

سونىمەن قاتار «نۇر وتان» پارتياسى ءتوراعاسىنىڭ ءبىرىنشى ورىنباسارى سپيكەرگە ءوزىنىڭ بايانداماسىندا ينفوگرافيكانى پايدالانۋعا كەڭەس بەردى.

«ەگەر دە يننوۆاتسيالار جايىندا بايانداما جاساۋ كەزىندە جاقسى دايىندالعان ينفگرافيكانى ۇسىنساڭ، وندا بەرگەن اقپاراتىڭ كوپشىلىك تاراپىنان مۇلدەم باسقاشا قابىلدانادى»، - دەپ اتاپ ءوتتى م. قۇل-مۇحاممەد.

ءسوز سوڭىندا ول ءاربىر 20 سەكۋند سايىن سلايدتاردى جاڭارتىپ تۇرىپ، بايانداما جاساعان استانا اكىمى اسەت يسەكەشەۆتەن ۇلگى الۋ كەرەكتىگىن اتاپ ءوتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى