جاقىپ اسانوۆ داۋلاسۋشىلاردى سوتقا جەتكىزبەي تاتۋلاستىراتىن ورگان قۇرۋدى ۇسىندى
بۇل تۋرالى بۇگىن سوت تورەلىگىن جۇزەگە اسىرۋدىڭ 2017-جىلعى قورىتىندىسىنا ارنالعان كەڭەيتىلگەن كەڭەستە ق ر جوعارعى سوتىنىڭ ءتوراعاسى جاقىپ اسانوۆ ايتتى، دەپ حابارلايدى قازاقپارات.
«بىزدە داۋدى تەك سوت شەشەدى دەگەن كوزقاراس قاتىپ قالعان. كەيدە باسىندا اشۋعا بەرىلىپ، سوتقا جۇگىنىپ، كەيىن باسىلىپ، «قاتتى كەتكەن جوقپىن با، الدىما كەلسە شەشۋ جولىن ىزدەر ەدىم عوي» دەپ وكىنىپ جاتامىز. سوتتار وسىنداي بەيبىت جولدى كورسەتەتىن، ۇرىس-كەرىسسىز، ءبىرىن-ءبىرىن تىڭداپ، مامىلەگە كەلۋگە جاعداي جاسايتىن «التىن كوپىر» بولۋى ءتيىس. سوت، اكىمدەر، اسسامبلەيا، پارتيالار بولىپ وسىنى قولعا الساق... قاي كەزدە دە سوزگە توقتاعان حالىقپىز عوي. ءبىتىمنىڭ، تاتۋلاسۋدىڭ بار پايداسىن جىلى، سۇيەگىنە وتەتىندەي، جۇرەگىنە جەتەتىندەي سوزدەرمەن ايتىپ ۇيرەنسەك، وندا قوعامدا شاعىم ازايادى. جالپى احۋال جاقسارادى. سوتتاسىپ، تارتىسىپ، ارازداسىپ جۇرگەن ادامداردا قانداي كوڭىل بولسىن»، - دەدى ول.
وسى رەتتە جاقىپ اسانوۆ كەڭەيتىلگەن كەڭەسكە قاتىسىپ وتىرعان وبلىس اكىمدەرىنىڭ ورىنباسارلارىنا ءوتىنىش جاسادى.
«سىزدەرگە ءوتىنىش، ايتىسىپ جۇرگەن اعايىنداردى ىمىراعا كەلتىرەتىن، بىتىمگە شاقىراتىن ونىڭ ارتىقشىلىعىن، ۇتىمدى جاعىن اشىپ كورسەتەتىن، سوتقا جەتكىزبەي تاتۋلاستىراتىن ءبىر ءتيىمدى ورگان جاساساق. وعان مىقتى مامانداردى دايىنداساق، مەدياتور، پسيحولوگ، كونفليكتولوگ، وتستاۆكاداعى سۋديالاردى جانە سوزگە شەشەن، ويى جۇيرىك، حالىقپەن تىكەلەي سويلەسە بىلەتىن، ءتىلىن تاباتىن، كوندىرە الاتىن تۇلعالاردى تارتساق»، - دەدى جوعارعى سوت ءتوراعاسى.
ونىڭ دەرەگىنشە، مىڭ ادامعا شاققاندا داۋدىڭ كوبىسى الماتىدا، استانادا، باتىس قازاقستان، پاۆلودار، قاراعاندى وبلىستارىندا تىركەلگەن.
«مىسالى وڭتۇستىك قازاقستان وبلىسىندا مىڭ ادامعا شاققاندا داۋلار الماتىمەن سالىستىرساق 5 ەسە از. جۇمىلا كوتەرگەن جۇك جەڭىل دەگەندەي، بار كۇشىمىزدى وسىعان سالساق، سوندا داۋ دا قىسقارادى، بيلىككە دە وكپە ازايادى، سوتتارعا دا سەنىم وسەدى»، - دەدى جاقىپ اسانوۆ.
اۆتور: مارلان جيەمباي
