سوتىنا سەنگەن ەل كەلەشەگىنە دە سەنىمدى - جاقىپ اسانوۆ
«مەنىڭ ويىمشا، ءبىز ءوزىمىزدىڭ پروبلەمالارىمىزدى، كەمشىلىكتەرىمىزدى قوعامعا جاسىرماي جەتكىزە بىلسەك، تۇسىندىرە بىلسەك قوعام قىزمەتىمىزدىڭ قىر-سىرىن ودان سايىن جاقسى بىلەتىن بولادى. ال ەندى قوعام، جۇرت ءبىزدىڭ جۇمىسىمىزدىڭ قىر-سىرىن بىلگەن سايىن بىزگە دەگەن، سۋديالارعا دەگەن تالاپ ودان ارى وسە تۇسەدى. بۇل ءتۇبى نەنى بەرەدى؟ ويتكەنى قوعام بىلگەننەن كەيىن ءبىزدىڭ ءار ءسوزىمىز، ءار قادامىمىز جۇرتتىڭ باقىلاۋىندا. ال ولاردىڭ باقىلاۋىندا بولعاننان كەيىن ءاربىر سۋديا، سوتتىڭ ءاربىر ءتوراعاسى ءوزىنىڭ جۇمىسىن جاقسارتۋعا، كەمشىلىگىن جويۋعا ۇمتىلادى»، - دەدى جوعارعى سوت ءتوراعاسى.
ونىڭ ايتۋىنشا، مەملەكەتتىك بيلىكتە سوتتىڭ الاتىن ورنى ەرەكشە. سوندىقتان جۇرت سوتقا سوڭعى ءۇمىتىن ارقالاپ كەلەدى، ادىلدىك سۇرايدى. كوڭىلى قالسا، سوتقا ەمەس بۇكىل مەملەكەتتىك بيلىككە وكپەلەيدى.
«سوندىقتان كەز كەلگەن ازامات زاڭدى سىيلايتىن، زاڭدى قۇرمەتتەيتىن قوعامدا ءومىر سۇرگىسى كەلەدى. نەگە؟ ويتكەنى سوتىنا سەنگەن ەل ءوزىنىڭ كەلەشەگىنە سەنەدى، بالالارىنا الاڭدامايدى. ولار مەملەكەتتى سىيلايدى، وتانىن قۇرمەتتەيدى. تارتىپكە باس ءيىپ، ۋايىمسىز ءومىر سۇرەدى. ال ينۆەستورلار نە دەيدى؟ بۇل ەلدىڭ سوتى ءادىل، دەپ قاراجاتىن قورىقپاستان سول ەلدىڭ ەكونوميكاسىنا سالادى. وسى جونىندە ەلباسى تالاي ايتىپ ءجۇر. دەگەنمەن ءبىز وسىنى ىلعي ەسىمىزدە ۇستاۋىمىز كەرەك»، - دەدى جاقىپ اسانوۆ.
اۆتور: مارلان جيەمباي
