وليمپياداعا شورت-ترەكتەن قوسىمشا كىمدەردىڭ قاتىساتىنى بەلگىلى بولدى

قازاقستان قۇراماسىنىڭ باس باپكەرى ءمادىعالي قارسىبەكوۆتىڭ ايتۋىنشا، 1500 مەتر قاشىقتىقتا الداعى وليمپيادادا نۇربەرگەن جۇماعازيەۆپەن بىرگە ەركەبۇلان شامۋحانوۆ باق سىنايتىن بولدى. سونداي-اق 5 مىڭ مەترلىك ەرلەر ەستافەتاسىنا قاتىسۋ ءۇشىن قازاقستان قۇراماسى ساپىندا نۇربەرگەن جۇماعازيەۆ، ابزال اجىعاليەۆ، دەنيس نيكيشا، ەركەبۇلان شامۋحانوۆ جانە رەزەرۆتە مەرسايد جاقسىبايەۆ دايىندالۋدا.

بۇدان بۇرىن قازاقستان قۇراماسى ون جولداما يەلەنگەن بولاتىن. ياعني 500 مەترلىك قاشىقتىقتا ابزال اجىعاليەۆ، دەنيس نيكيشا جانە نۇربەرگەن جۇماعازيەۆ جۇلدە ءۇشىن تالاسقا تۇسەدى. نۇربەرگەن سونداي-اق 1 مىڭ جانە 1500 مەتردەن بايگەگە قاتىسادى. قىزداردان اناستاسيا كرەستوۆا 500، 1000 جانە 1500 مەتر قاشىقتىقتا باعىن سىنايدى. وعان قوسا ءاليا كيم (كيم يونگ ا) 1000 جانە 1500 مەتردەن ايدىنعا شىعادى.

«قازىرگى كەزدە جاپونيادا جاتتىعۋدامىز. وليمپيادا ويىندارىندا مەدال الۋ ءۇشىن بارىمىزدى سالامىز»، دەدى «قازاقپارات» تىلشىسىنە قازاقستاننىڭ ەڭبەك سىڭىرگەن جاتتىقتىرۋشىسى ءمادىعالي قارسىبەكوۆ.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى