شىمكەنتتە بوكستان حالىقارالىق چەميونات باستالدى
جاس سپورتشىلار باسەكەسىنىڭ اشىلۋ بارىسىندا ەلىمىزدەگى سپورتتى دامىتۋ باعىتىندا اتقارىلىپ جاتقان جۇمىستار ءسوز بولىپ، بوكستى ناسيحاتتاۋ ءۇشىن مەملەكەت تاراپىنان كورسەتىلىپ جاتقان قولداۋلار جايى ايتىلدى. جىل سايىنعى ءداستۇرلى تۇردە وتەتىن جارىستا بيىلعى جىلى 300 گە تارتا سپورتشى باعىن سىنادى. جاستاردى بۇقارالىق سپورتقا باۋلىپ، جامان ادەتتەن اۋلاق بولۋعا شاقىرۋ ماقساتىندا ۇيىمداستىرىلعان سايىسقا 24 پەن 58 كەلى اراسىنداعى سالماق دارەجەسىندەگى جاس وسپىرىمدەر سىنعا ءتۇستى. كىلەڭ مىقتىلار باس قوسقان دودادا سپورتشىلاردىڭ جوعارى دەڭگەيدەگى دايىندىقپەن كەلگەنى بايقالدى. قاڭتاردىڭ 26 سىنا دەيىن جالعاساتىن جارىستا قاتىسۋشىلار جەڭىستى قولدان بەرمەۋگە تىرىسىپ باعۋدا. كورشى ەلدەن كەلگەن بىلعارى قولعاپ شەبەرلەرى دە جۇلدەگە مول ءۇمىت ارتىپ، جارىسقا بەلسەنە ارالاستى.
«مەن وزبەكستان مەملەكەتىنەن كەلدىم. بۇل سايىسقا قاتىسشۋى ءۇشىن ءبىر جىل دايىندىعىمدى سارپ ەتتىم. ءبىرىنشى كەزەڭدە شىمكەنتتىك بوكسشىمەن جۇدىرىقتاستىم. ويىن باستالعان العاشقى مينۋتتا-اق قارسىلاسىمدى نوكاۋتقا ءتۇسىردىم. ەندى وسى تۋرنيردە جەڭىسكە جەتەمىن دەپ ۇمىتتەنەم»، - دەيدى وزبەكستاندىق سپورتشى ءابدۋلازيز ءابدۋحاميتوۆ.
