استراحاندا ورىس تىلىنە اۋدارىلعان اباي ولەڭدەرىنىڭ جيناعى تانىستىرىلدى
«دومبرا مويا نە ۆەداەت پوكويا» اتتى اۋدارمالار جيناعىنىڭ اۆتورى يۋري شەرباكوۆ - قازاق اقىندارىنىڭ ادەبي تۋىندىلارىن اۋدارۋمەن بۇرىننان اينالىسادى. ول «اق تورنا» تۇركىتىلدەس ولەڭ-جىرلار اۋدارمالارىنىڭ ءبىرىنشى حالىقارالىق بايقاۋىنىڭ، وزگە دە كوپتەگەن حالىقارالىق جانە بۇكىلرەسەيلىك ادەمي سىيلىقتار مەن بايقاۋلاردىڭ لاۋرەاتى.
ءىس-شاراعا قازاقستاننىڭ استراحانداعى كونسۋلى قانات شەكقاليەۆ، قازاق دياسپوراسىنىڭ وكىلدەرى جانە استراحاندىق ادەبيەت سۇيەر قاۋىم قاتىستى.
قازاقستاندىق ديپلومات اتالمىش كىتاپ رەسەيلىك وقىرمانعا ۇلى ابايدىڭ شىعارماشىلىعىمەن ەتەنە تانىسۋعا مۇمكىندىك بەرەتىنىن اتاپ ءوتتى.
«اباي الەمى - ءبىزدىڭ جول سىلتەۋشىمىز. ول بىزگە جولدان تايماۋدى ۇيرەتەدى. ول بويىنشا باستى مىندەتتەرىمىزدى ايقىندايمىز. قازىرگى زاماننىڭ تۇيىتكىلدى سۇراقتارىنا اقىن تالاي ۋاقىت بۇرىن جاۋاپ بەرىپ كەتكەن. اباي ءومىردىڭ ءمانى، جەر بەتىندەگى تىرشىلىگىمىزدىڭ ماقساتى، ادامدار مەن حالىقتار اراسىنداعى دوستىق تۋرالى تەرەڭىنەن جانە وتە ادىلەتتى وي تولعايدى»، - دەيدى قانات شەكقاليەۆ.
