اۆتوبۋس ورتىنەن امان قالعان ءۇش جۇرگىزۋشى ۋاقىتشا تەرگەۋ يزولياتورىنا قامالدى

«اقتوبە وبلىسىنداعى اۆتوبۋس ورتىنە قاتىستى قىلمىستىق ءىس ءىء ى م ايماقارالىق جەدەل تەرگەۋ توبىنىڭ تەرگەۋ دەپارتامەنتىنە كەلىپ ءتۇستى. تەرگەۋ كەزىندە جۇرگىزۋشىلەر ءورت قاۋىپسىزدىگىن ساقتالماعانى، كولىك قۇرالدارىن پايدالانۋ زاڭدىلىعى ەسكەرىلمەگەنى جانە اۆتوبۋس ىشىندە جىلىتۋ شامى قولدانىلعانى بەلگىلى بولدى. اۆتوبۋستىڭ ءۇش جۇرگىزۋشىسى دە وسى قىلمىسقا قاتىسى بار ەكەنى انىقتالدى. سوندىقتان 24 - قاڭتار كۇنى كەشكى ساعات 22:40-تا ءۇش جۇرگىزۋشى ۇستالىپ، ولار اقتوبە قالاسىنداعى ۋاقىتشا تەرگەۋ يزولياتورىنا قامالدى. ولارعا قىلمىستىق كودەكستىڭ 345-بابى بويىنشا ايىپ تاعىلىپ وتىر. قىلمىستىق ءىستىڭ زاڭدىلىعىن وڭتۇستىك قازاقستان جانە اقتوبە وبلىستارىنىڭ پروتسەسسۋالدى پروكۋرورلارى باقىلايدى. تەرگەۋ باس پروكۋراتۋرا مەن ءى ءى م باقىلاۋىندا بولادى»، - دەدى اقتوبە وبلىسى پروكۋراتۋراسىنىڭ اپپارات جەتەكشىسى جاسۇلان داۋلەمبايەۆ.

ايتا كەتەيىك، 18 - قاڭتار كۇنى اقتوبە وبلىسىندا اۆتوبۋس ورتەنىپ، 52 وزبەكستان ازاماتى قازا بولدى. ال 5 ادام امان قالدى. ونىڭ ۇشەۋى قازاقستان، ەكەۋى وزبەكستان ازاماتى. ەكى وزبەكستان ازاماتى ءالى اۋرۋحانادا جاتىر. ولاردىڭ دەنساۋلىعى جاقسى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى