ءانشى مۇقاسان بالالارىنىڭ قازاقشا بىلمەۋ سەبەبىن ءتۇسىندىردى
ويتكەنى ونەر يەسىنىڭ ۇلدارى مەملەكەتتىك ءتىلدى مەڭگەرۋدە كەنجە قالعان.
ءانشىنىڭ وتباسىنداعى مۇنداي ولقىلىقتىڭ ورىن الۋىنىڭ وزىندىك سەبەبى دە بار كورىنەدى.
Stan.kz تىلشىسىنە ەكسكليۋزيۆتى سۇحبات بەرگەن مۇقاسان، الماتىداعى قازاق ءتىلدى بالاباقشالاردىڭ تالاپقا ساي بولماۋىمەن تۇسىندىرەدى.
«بۇل جايلى ايتسام، ءبىر جاعىنان جامانداعانداي بولامىن. مەن مىسالى ۇلكەن ۇلىم ديماشتى ىزدەپ ءجۇرىپ قازاقشا بالاباقشاعا بەردىم. ءبىر جاعىنان مەنىڭ كەلىنشەگىم وسى الماتىنىڭ قىزى. ورىسشا وسكەن قىز. ءبىراق مەن سوندا دا بالامىز قازاقشا وقيدى، قازاقشا سويلەسىن دەپ قازاق بالاباقشاسىنا اپاردىم.
ءبىر وكىنىشتىسى بالامىز سول بالاباقشادا التى اي ءجۇرىپ، ءبىر اۋىز قازاقشا ۇيرەنگەن جوق. ءبىر تاقپاق بىلمەيدى. سوسىن ءبىر كۇنى قاراساق، بالامىز نە قازاقشا، نە ورىسشا سويلەمەيتىن ءدۇبارا بولىپ كەلە جاتىر»، - دەيدى مۇقاسان.
قازاق ءتىلدى بالاباقشالاردان كوڭىلى قالعان اتا-انا، تۇڭعىشىن ورىس تىلىندە تاربيەلەيتىن ورتالىققا اپارۋدى ءجون دەپ شەشەدى. ابىروي بولعاندا ۇلكەن ۇلى ديماش وزگە ءتىلدى تەز مەڭگەرىپ، جاقسى ناتيجەگە قول جەتكىزە باستاعانىن بىردەن اڭعارتقان.
«سوسىن امال جوق ءبىر ورىس بالاباقشاسىنا بەرىپ ەدىك، ۇلىم ءبىر اپتاعا جەتپەي كولەمدى تاقپاقتاردى جاتتاپ، سايراپ شىعا كەلدى. ول جەر ءارى مەكتەپ، ءارى بالاباقشا ەكەن.
وتە جاقسى ۇيرەتتى. سودان كەيىن مەكتەپكە باراتىن كەز كەلدى. ەندى بالاباقشادا ورىسشا تاربيەلەندى، ونىڭ ۇستىنە جۇبايىم دا ورىس ءتىلدى بولعاندىقتان، بالالاردىڭ ساباعىن ءوزى قاداعالايدى عوي. ءسويتىپ ورىسشا مەكتەپكە بەردىك، وكىنىشكە وراي»، - دەيدى ءانشى.
سونداي-اق، ەكىنشىسى داستان مەن ءۇشىنشى اتۇستارى دياردى دا تۇڭعىشى ديماش ءبىلىم العان بالاباقشاعا بەرىپ، كەيىن بارلىعىن ورىس مەكتەبىنە بەرگەن. بۇگىندە بالالارىنىڭ قازاق تىلىنە كەلگەندە شورقاقتاۋ بولۋى دا سوندىقتان ەكەن.
«الماتىدا مەن تۇراتىن اۋداندا، ياعني ءبىزدىڭ كورشىلەردىڭ ىشىندە ءبىر ورىس جوق. بارلىعى قازاقتار. ءبىراق بارلىعى ورىسشا سويلەيدى. ولارعا مەن: «ەي، نەگە ورىسشا سويلەسەسىڭدەر، قازاقشا سويلەسىڭدەر» - دەپ ۇرسامىن.
ءبىزدىڭ كوزىمىزشە بىلدىرلاپ سويلەسەدى دە، كوزىمىز تايىپ كەتسە ءبارىبىر ورىسشا سويلەيدى ەكەن. بۇل ەندى ءبىزدىڭ ءبىر اقساپ جۇرگەن جەرىمىز عوي. ءبىراق دەگەنمەن دە كوش جۇرە تۇزەلەدى، ونىڭ بارلىعى ورىنىنا كەلەدى دەپ ويلايمىن»، - دەيدى مۇقاسان شاحزادايەۆ.
ءبىراق ءانشى انا ءتىلىن جەتىك بىلمەيتىن ۇلدارى ءۇشىن ەت- جاقىندارى مەن ارىپتەستەرىنىڭ اراسىندا قىسىلاتىنىن جاسىرمادى. جۇلدىزدى اكە كۇندەلىكتى قازاقشا سويلەسۋگە ارەكەت جاساپ، ءىزباسارلارىن قازاق ءتىلىن ۇيرەتۋگە تىرىسقانىمەن، ازىرگە ەشقانداي ناتيجەگە قول جەتكىزبەگەنىن ايتادى.
