قورعانىس مينيسترلىگى مەن كاسىپكەرلەردىڭ تەكەتىرەسى: كىمدىكى دۇرىس - فوتو
وتىرىستى «تاراپتاردىڭ تارتىسى» دەسە دە بولادى. سەبەبى، مەملەكەتتىك ساتىپ الۋ بويىنشا ءبىر مامىلەگە كەلە الماعان مەملەكەتتىك ورگاندار مەن كاسىپكەرلەردىڭ داۋىنا نۇكتە قويىلار ەمەس، دەپ حابارلايدى «قازاقپارات» ح ا ا ءتىلشىسى.
مەملەكەتتىك ورگاندار مەملەكەتتىك ساتىپ الۋ تۋرالى كاسىپكەرلەرمەن كەلىسىمگە كەلسە دە، ۋاقىتى كەلگەندە ءتيىستى اقشاسىن كاسىپكەرلەرگە نەگە بەرمەيدى؟ «اتامەكەن» ق ر ۇلتتىق كاسىپكەرلەر پالاتاسىنىڭ بۇگىن كوتەرگەن ماسەلەسىنىڭ مازمۇنى - وسى. پالاتانىڭ كاسىپكەرلەردى قۇقىقتىق قورعاۋ دەپارتامەنتىنىڭ ديرەكتورى ولەگ ساۆەلەنكونىڭ ايتۋىنشا، بۇگىنگى تاڭدا پالاتاعا جۇگىنگەن شاعىمى كوپ كاسىپكەرلەر كوبەيىپ كەتكەن.
«وسى شاعىمداردى زەرتتەي كەلە ءبىز كاسىپكەرلەردىڭ مۇددەسىنىڭ بۇزىلۋىنىڭ ەڭ وتكىر كورىنىستەرىن مىسال ەتپەكپىز»، - دەيدى ول.
ساۆەلەنكو ەكى جىلدان اسسا دا، شەشىمى تابىلماي كەلە جاتقان قورعانىس مينيسترلىگى مەن كاسىپكەرلەردىڭ اراسىنداعى داۋدى مىسالعا كەلتىردى. ونىڭ ايتۋىنشا، 2016 -جىلدىڭ جەلتوقسان ايىنىڭ سوڭىنا قاراي قر قورعانىس مينيسترلىگى كاسىپكەرلەرمەن بۇرىن جاسالعان نەگىزگى شارتتار نەگىزىندە قوسىمشا كەلىسىمدەرگە قول قويعان. ياعني، 2017 -جىلى قاڭتاردان اقپان ايىنا دەيىن (بايقاۋ پروتسەدۋرالارى شەشىلگەنشە) كاسىپكەرلەر اسكەري بولىمشەلەردەگى اسكەري قىزمەتشىلەردى تاماقتاندىرۋعا مىندەتتەلگەن.
«الايدا قىزمەت كورسەتۋ جاسالعان سوڭ قر قورعانىس مينيسترلىگى ورىندالعان جۇمىس اكتىلەرىنە قول قويۋدان جانە كاسىپكەرلەرگە جاسالعان قىزمەتتەرى بويىنشا اقشا تولەۋدەن باس تارتقان. وسىنىڭ سالدارىنان بيزنەس قارجىلىق شىعىنعا باتىپ وتىر. ءوزىنىڭ بۇل ارەكەتىن مەملەكەتتىك ورگان شارتتىڭ قازىناشىلىق ورگانداردا ۋاقتىلى تىركەلمەگەندىگىمەن تۇسىندىرەدى»، - دەيدى ول.
ولەگ ساۆەلەنكو داۋدىڭ اقىرى كاسىپكەرلەر قارجىلىق تىعىرىققا ۇشىراتقانىن، قازىرگى تاڭدا 200 ميلليون تەڭگە كولەمىندە شىعىنعا باتقان 11 شاعىن جانە ورتا بيزنەس سۋبەكتىسى جايىندا مالىمەت بارىن العا تارتادى. بۇعان قوسا كاسىپكەرلەر قىزمەتكەرلەرىنە ۋاقتىلى ەڭبەكاقىسىن بەرە الماي، سالىعىن تولەۋگە، نەسيەسىن وتەۋگە مۇرشاسى بولماي وتىرعان كورىنەدى.
كەڭەس بارىسىندا مينيسترلىككە تاعىلعان مۇنداي سىنعا قر قورعانىس مينيسترلىگىنىڭ مەملەكەتتىك ساتىپ الۋ باس باسقارماسىنىڭ باستىعى الەكساندر ستەپانەنكو جاۋاپ بەردى. ونىڭ ايتۋىنا قاراعاندا 2016 -جىلدىڭ سوڭىنا قاراي مەملەكەتتىك ساتىپ الۋ بويىنشا باس باسقارما مەن كاسىپكەرلەردىڭ اراسىنداعى ۋاعدالاستىق بيۋدجەت كودەكسىنىڭ شەڭبەرىنەن شىعىپ كەتەتىن قىزمەت تۇرىنە اكەپ سوقتىرعان.
«2017 -جىلدىڭ قاڭتار جانە اقپان ايلارىندا 11 كومپانياعا مىندەتتى كەلىسىم زاڭدى كۇشىنە ەنگىزىلمەي تۇرىپ قىزمەت كورسەتىلىپ كەتكەن. فيرمالاردىڭ قارجىلىق شىعىنعا تاپ بولعانىن ەسكەرىپ، قورعانىس مينيسترلىگى 2017 -جىلدىڭ اقپان ايىندا اتالعان قىزمەتتەردى كورسەتۋشىلەرگە (كومپانيالار - اۆت. ) قاجەتتى كەڭەس بەردى. مۇنىڭ ارتى سوتقا ۇلاستى. ءبىراق، مىندەتتەمەنىڭ راستالماعانىنا قاراماستان، قورعانىس مينيسترلىگى سوت ءتارتىبى بويىنشا شىعىندى وتەۋدەن باس تارتقان جوق. مامانداندىرىلعان اۋدانارالىق ەكونوميكالىق سوتتىڭ شەشىمى، سونىمەن بىرگە اپپەلياتسيالىق ينستانتسيا كۇنى كەشەگە دەيىن تاراپتاردى ورتاق مامىلەگە كەلتىرە المادى. كاسىپكەرلەردىڭ تالاپتارى قاناعاتتاندىرىلمادى»، - دەيدى ول.
الەكساندر ستەپانەنكونىڭ ستاتيستيكا بويىنشا مالىمەت كەلتىرىپ، تاسىمالداۋشى بەس كومپانيادان شاعىم تۇسكەنىن ايتادى.
«ەگەر تاراپتاردىڭ ءبىرى مەملەكەتتىك مەكەمە بولسا، قولدانىستاعى زاڭناما ازاماتتىق كودەكس پەن ازاماتتىق قۇقىق نورمالارىن قولدانۋعا جول بەرمەيدى. سوعان بايلانىستى قارجى مينيسترلىگىنە دە سۇراۋ جولدادىق. ءبىز سوت ءتارتىبى بويىنشا مىندەتتەمەلەردەن باس تارتپايتىنىمىزبەن، ءبىراق سوتقا دەيىنگى تەرگەۋ امالدارى ءبىزدىڭ قالاۋىمىز بويىنشا شەشىم شىعارا المايدى»، - دەيدى ول.
قورعانىس مينيسترلىگىنىڭ وكىلى اتالعان ماسەلەنىڭ، وكىنىشكە قاراي، جۇيەلى تۇردەگى سيپاتى بارىن اتاپ ءوتىپ، ماسەلە ءبارىبىر ءبىر كۇنى شەشىمىن تاباتىنىنا سەنىم ءبىلدىردى.
«ونى شەشۋ ءۇشىن الدىمەن زاڭنامالىق بازانى جەتىلدىرىپ، فورس- ماجورلىق جاعدايدا مەملەكەتتىك ساتىپ الۋ بويىنشا كەلىسىمگە كەلۋ ماسەلەسىن تالداۋ كەرەك. نەلىكتەن مۇنداي ماسەلە تۋىندادى؟ سەبەبى، وسىناۋ قوسىمشا كەلىسىمگە كەلۋ كەزىندە 2016 -جىلى قولدانىستا بولعان كەلىسىمدەر 31 -جەلتوقساننان باستاپ كۇشىن جويعان. دەسە دە، اتالعان ماسەلەنىڭ شەشىمىن تابارمىز دەگەن ۇمىتتەمىز»، - دەپ ءتۇيدى الەكساندر ستەپانەنكو.
