جوشى حاننىڭ قايدا جەرلەنگەنىن وزگەلەردىڭ بىلمەۋى ءوزىمىزدىڭ كەمشىلىگىمىز - مينيستر
مۇنداي پىكىردى بۇگىن ۇكىمەت ۇيىندە وتكەن باسپا ءسوز ءماسليحاتىندا ق ر مادەنيەت جانە سپورت ءمينيسترى ارىستانبەك مۇحامەدي ۇلى ءبىلدىردى، دەپ حابارلايدى قازاقپارات.
«مەن ءۇشىن التاي قازاقستاننىڭ بىرەگەي مارجانى سانالادى. نيكولاي رەريح تە شامبالا تاۋلى التايدا تۇرعاندىعىن ايتقان ەدى. ءدال وسى جايت ۇلكەن قىزىعۋشىلىق تۋدىردى. وتكەن جىلى ءبىز ونىڭ سۋرەت كورمەسىن وتكىزدىك. ونىڭ جۇمىستارىنىڭ كوپشىلىگى شىعىس قازاقستانداعى قاسيەتتى جەرلەرگە ارنالعان»، - دەدى ارىستانبەك مۇحامەدي ۇلى.
سونىمەن قاتار ول الەمدىك قاۋىمداستىق ءبىلىپ، تانۋى ءتيىس قازاقستانداعى قاسيەتتى ورىنداردىڭ ءبىرى رەتىندە ۇلىتاۋدى اتادى.
«وندا جوشىحاننىڭ ماۆزولەيى بار. شەتەلدىك كەلۋشىلەرگە جوشى حان مازارىن كورسەتكەندە ولار تاڭ قالادى. شىڭعىس حاننىڭ ۇلكەن ۇلىنىڭ قازاقستاندا جەرلەنۋى بۇكىل الەمدە زور قىزىعۋشىلىق تۋدىرادى. ال مۇنى الەمدىك قوعامداستىقتىڭ بىلمەۋى ءبىزدىڭ ۇلكەن كەمشىلىگىمىز»، - دەدى مينيستر.
ونىڭ اتاپ وتۋىنشە، قازىرگى ۋاقىتتا ەلىمىزدەگى تۋريستىك سالانى دامىتۋعا ءىرى حالىقارالىق ينۆەستورلار دا قىزىعۋشىلىق تانىتۋدا.
«ماسەلەن، مەملەكەت باسشىسى تاياۋدا اقش- قا جاساعان ساپارى بارىسىندا گولليۆۋدتاعى امەريكالىق كينويندۋستريا باسشىلارىمەن كەزدەستى. ولار قازاقستاندا جۇمىس ىستەۋگە ايرىقشا قىزىعۋشىلىق تانىتىپ وتىر»، - دەدى ول.
اۆتور: مارلان جيەمباي
