قارايعان قار: ەرلان قوشانوۆ اكىمدىككە ارنايى تاپسىرما بەردى
«مەن بۇرىن ونەركاسىپ ورىندارىندا جۇمىس ىستەدىم. ول كەزدە قالدىقتاردى شىعارۋ كولەمى اۋا رايىنا قاراي رەتتەلەتىن. جەل باياۋ كەزدە ءوندىرىس قۋاتى 15-20 پايىزعا تومەندەتىلەتىن. قازىر بۇل ءتارتىپ بار ما؟»، - دەدى قاراعاندى وبلىسىنىڭ اكىمى ەرلان قوشانوۆ.
بۇرىن اتالعان تۇيىتكىلمەن كازگيدرومەت اينالىساتىن. قازىر جاعىمسىز مەتەوجاعداي بار، ال وسىعان وراي زاڭدى تۇرعىدا ءوندىرىس كولەمىن رەتتەۋ ماسەلەسى قاراستىرىلمايدى.
«جاعىمسىز مەتەو جاعدايدى كاسىپورىندار دا مەملەكەتتىك قۇزىرەتتى ورگاندار دا كوزگە ءىلىپ وتىرعان جوق. مەن بۇگىن سايتقا كىردىم. ول جەردە قاراعاندىدا 24- قاڭتار كۇنى اۋا لاستانۋىنا اكەپ سوعاتىن جاعىمسىز مەتەو جاعداي دەپ جازىلعان. ەندى قاراڭىزدار، اقپارات جوق ەمەس بار، ءبىراق وعان ەشكىم دە نازار اۋدارىپ وتىرعان جوق»، - دەدى «ەكومۋزەي» مەكەمەسىنىڭ ديرەكتورى دميتري كالمىكوۆ.
جەرگىلىكتى ەكولوگيا دەپارتامەنتىنىڭ دەرەكتەرىنە سۇيەنسەك، 2017-جىلى اتمسفەراعا شىعارىلعان زياندى قالدىقتاردىڭ كولەمى 290 مىڭ توننانى قۇراعان. ونىڭ باسىم بولىگى، 221 مىڭ توننا، ياعني 77 پايىزى «ارسەلورميتتال تەمىرتاۋعا» تيەسىلى.
ەرلان قوشانوۆ كومپانيا وكىلدەرىنە، سونىمەن بىرگە تەمىرتاۋ قالاسىنىڭ اكىمدىگىنە قورشاعان ورتانىڭ جاعدايى بويىنشا قوعامدىق مونيتورينگ ۇيىمداستىرۋ جونىندە تاپسىرما بەردى.
ەسكە سالا كەتەيىك، قاڭتاردىڭ باسىندا الەۋمەتتىك جەلىلەر ارقىلى تەمىرتاۋداعى قاردىڭ قارايىپ كەتكەنى تۋرالى اقپارات تاراعان. تەمىرتاۋلىقتان وسىعان بايلانىستى بەلسەندى توپتارعا بىرىگىپ، ماسەلەنىڭ ءمانىسىن انىقتاۋدى تالاپ ەتكەن بولاتىن. تەمىرتاۋ قالاسى اكىمىنەن قالاعا جاۋعان قاردىڭ بەتى ءاپ-ساتتە قارايىپ كەتۋىنە بايلانىستى ەكولوگيا دەپارتامەنتىنە حات جولداندى. سونداي-اق بۇل ماسەلەنى انىقتاۋ ءۇشىن ارنايى جۇمىس توبى دا قۇرىلدى.
