استانا مەشىتتەرى مۇقتاجدارعا تەگىن كومىر جەتكىزىپ، ىستىق تاماق تاراتتى
استانا قالاسى مەشىتتەرىنىڭ باستاماسىمەن ازاماتتار جۇمىلىپ، ايالدامالاردا قوعامدىق كولىكتەردى كۇتىپ قالعان قالا تۇرعىندارىن دىتتەگەن جەرىنە تەگىن جەتكىزىپ، جول تازالايتىندار مەن قۇرىلىسشىلارعا تەگىن ىستىق تاماق تاراتتى. سونداي-اق، قايىرىمدىلىق شاراسى بارىسىندا ءۇيىن جىلىتا الماي وتىرعان 25 وتباسىعا كومىر جەتكىزىلىپ بەرىلەدى.
«ايازدى كۇندەرى تۇرعىندارعا بارىنشا جاردەمدەسۋ، كومەككە مۇقتاج كىسىلەرگە، جانۇيالارعا قول ۇشىن سوزۋ - اكسيامىزدىڭ باستى ماقساتى. كەشە تۇرمىسى تومەن 4 ۇيگە كومىر جەتكىزىلدى. ءار اۋلاعا 1,5 توننادان وتىن ءتۇسىرىلدى. اپتانىڭ سوڭىنا قاراي 2 تونناعا دەيىن كوبەيتىپ، 25 وتباسىنا كومىر جەتكىزىلەدى دەپ كوزدەپ وتىرمىز»، - دەپ مالىمدەدى «نۇر استانا» مەشىتىنىڭ ۇستازى ءىلياس وتاروۆ.
ونىڭ مالىمەتىنە سۇيەنسەك، ەكى كۇندە 400 ادامعا تەگىن ىستىق تاماق تاراتىلعان. ولاردىڭ اراسىندا ايالدامادا اۆتوبۋس كۇتكنەدەر، كوشە تازالايتىندار مەن قۇرىلىسشىلار بار.
سونىمەن قاتار، اكتسيا كەزىندە ارنايى لوگوتيپتەرى بار كولىكتەر ايالدامالاردا قوعامدىق اۆتوبۋستاردى كۇتىپ تۇرعانداردى دىتتەگەن جەرىنە تەگىن جەتكىزەدى. ءىلياس وتاروۆتىڭ ايتۋىنشا، شارا تۋرالى الەۋمەتتىك جەلىدەن بىلگەن تۇرعىندار وعان ءوز ۇلەستەرىن قوسىپ جاتىر.
«اكسيانىڭ باسىندا 20 كولىك بولسا، بۇگىن ءبىزدىڭ قاتارىمىزدا 50 شاقتى جۇرگىزۋشى بار. ولاردىڭ كولىكتەرىنە ءوزىمىزدىڭ ارنايى لوگوتيپىمىزدى جابىستىرىپ، تاكسيدىڭ شارتتارىن قولدارىنا ۇستاتىپ، كولىكتەردى جىبەرىپ جاتىرمىز. ماشيناسى جوق كىسىلەردىڭ، تاڭەرتەڭ كولىگى وت الماي جاتقان ادامداردى تاكسيلەرگە وتىرعىزىپ، قىزمەت ءۇشىن ءوز اقشاسىن تولەگەن جاعدايلار دا كەزدەسەدى. كۇننىڭ سۋىعىنا قاراماستان قالالىقتاردىڭ جان جىلۋىن، جۇرەگىنىڭ كەڭدىگىن، مەيىرىمدىلىگىن كورسەتىپ جاتقان جايى ءبىزدى قۋانتادى»، - دەپ تۇيىندەدى ول.
«استانا - مەيىرىمدى قالا» اكسياسى اياز كۇشى قايتقانشا جالعاسادى.
