ساپاربايەۆ ءىرى مۇناي كومپانياسىنا ۇسىنىس ايتتى
اقتوبەدەگى ءىرى مۇناي كومپانيالارىنىڭ باسشىلارىمەن وتكەن جيىندا ينۆەستيتسيا سالۋ، ۇجىمدىق كەلىسىمشارتتى ورىنداۋ، بيزنەستىڭ الەۋمەتتىك جاۋاپكەرشىلىگى سەكىلدى ماسەلەلەر قامتىلدى.
ءوڭىر باسشىسى بەردىبەك ساپاربايەۆ ءبىر كۇندە «سنپس- اقتوبە مۇناي گاز» ا ق، «ۇلى قابىرعا»، «قازاحويل» ج ش س جۇمىسىمەن تانىستى. ەڭ ءىرى مۇناي ءوندىرۋشى - «سنپس- اقتوبە مۇناي گاز» ا ق. بۇل كومپانياعا وندىرىلەتىن مۇنايدىڭ %67 جانە گازدىڭ %88 تيەسىلى. ءارى قازاقستاننىڭ مۇناي نارىعىنداعى كومىرسۋتەك شيكىزاتىن ءوندىرۋ ۇلەسى 7,7 پايىزدى قۇرايدى. قازىرگى كەزدە كومپانيادا 6,3 مىڭنان استام ادام جۇمىس ىستەيدى.
«سنپس- اقتوبە مۇناي گاز» ا ق باس ديرەكتورى ۆان تسزيۋنجەن جيىنعا قاتىسۋشىلارعا وتكەن جىلدىڭ قورىتىندىسىن جەتكىزدى. وتكەن جىلى كاسىپورىن 5 ميلليون توننا مۇناي جانە مۇناي ونىمدەرىن وندىرگەن. سونىمەن قاتار، 5,105 ميلليارد تەكشە مەتر تاۋارلى ىلەسپە گازى تاراتىلدى. بۇل كومپانيا تاريحىنداعى رەكوردتىق كورسەتكىش. ءوندىرىستى دامىتۋعا شامامەن 100 ميلليارد تەڭگە ينۆەستيتسيا سالىندى.
«اكتسيونەرلىك قوعام باسشىلىعىنىڭ ەسەبى قاناعاتتاندىرارلىق، جۇمىس بەرۋشى مەن ەڭبەك ۇجىمى اراسىنداعى الەۋمەتتىك-سەرىكتەستىك قارىم-قاتىناس تۇراقتى. باسشىلىق مەملەكەت باسشىسى مەن ۇكىمەتتىڭ قويعان تاپسىرمالارىنتىڭ ماڭىزدىلىعىن ءتۇسىنىپ وتىر»، - دەدى وبلىس اكىمى ب. ساپاربايەۆ.
جيىن كەزىندە ءوڭىر باسشىسى ونەر ورتالىعىن سالعان مۇناي كومپانياسىنا ءوز العىسىن جەتكىزدى. مادەنيەت وشاعى وتكەن جىلى سالىنىپ، پايدالانۋعا بەرىلدى. جوبا قۇنى - 1,5 ميلليارد تەڭگە.
«ونەر ورتالىعىنىڭ اشىلۋى قالامىزدىڭ مادەني ومىرىندەگى ماڭىزدى وقيعا بولدى. اقتوبەلىكتەردىڭ اتىنان وسى ەرەكشە نىساننىڭ قۇرىلىسى ءۇشىن ريزاشىلىعىمدى بىلدىرەمىن. الەۋمەتتىك جاۋاپكەرشىلىكتى ودان ءارى ءتيىمدى جۇزەگە اسىرۋ ماقساتىندا اقتوبەدە ەل پرەزيدەنتىنىڭ «سيفرلىق قازاقستانعا» كوشۋ مىندەتتەرىن ورىنداۋعا مۇمكىندىك بەرەتىن جاڭا اقپاراتتىق تەحنولوگيالار ورتالىعىن سالۋدى ۇسىنامىز»، - دەدى ب. ساپاربايەۆ.
اقتوبە وبلىسى اكىمىنىڭ باسپا ءسوز قىزمەتىنىڭ حابارلاۋىنشا، ءوڭىر باسشىسى ۇجىمدىق كەلىسىمشارتتاردىڭ ورىندالۋىن، جۇمىسشىلاردىڭ ەڭبەك اقىلارىن كەمىندە %15 ارتتىرۋدى، جۇمىس ورىندارىنىڭ ساقتالۋىنا جانە شەتەلدىك جۇمىس كۇشى سانىن ازايتۋعا باسا نازار اۋداردى.
كەزدەسۋ سوڭىندا وبلىستىق اكىمدىك، «سنپس - اقتوبە مۇناي گاز» ا ق جانە كاسىپوداقتاردىڭ ايماقتىق بىرلەستىگى اراسىندا ەڭبەك قاتىناستارىن رەتتەۋ جانە جۇمىسشىلارعا الەۋمەتتىك كەپىلدىكتەر بەرۋ ماسەلەلەرى بويىنشا مەموراندۋمعا قول قويدى.
