ەلوردادا جاڭا ونكولوگيالىق ورتالىق پايدا بولادى
ونكولوگيالىق اۋرۋلارمەن كۇرەس جۇرگىزۋ بويىنشا كەشەندى جوسپار قابىلداپ، عىلىمي ورتالىق اشۋ كەرەك. ەلباسى حالىققا جولداۋىندا ادام كاپيتالى ماسەلەسىن قوزعاي وتىرىپ، ءتيىستى نۇسقاۋ بەردى. وسى رەتتە بيىل نازاربايەۆ ۋنيۆەرسيتەتى جانىندا جۇمىس ىستەيتىن جاڭا ونكولوگيالىق ورتالىقتىڭ قۇرىلىسى باستالۋ كەرەك. بۇل ماقساتتاعى جۇمىستار 3 جىلعا سوزىلادى دەپ جوسپارلانىپ وتىر.
ماسسيمو پينياتەللي، نازاربايەۆ ۋنيۆەرسيتەتى مەديتسينا مەكتەبىنىڭ دەكانى:
- بۇل امەريكالىق ۇلگىدەگى جوبا بولماق. وندا قاتەرلى ىسىكتى ەمدەپ، الدىن الۋ بويىنشا جوعارى دەڭگەيدە مەديتسينالىق قىزمەت كورسەتىلەدى. سونداي- اق ونكولوگيالىق ورتالىقتا عىلىمي- زەرتتەۋ جۇمىستارىنا ەرەكشە ءمان بەرىلەتىن بولادى. بۇل دا اسا ماڭىزدى. ونكولوگيالىق ورتالىق جوباسىنا نازاربايەۆ ۋنيۆەرسيتەتىنىڭ مەديتسينا مەكتەبى دە قاتىسادى.
ەلباسى جولداۋىندا وقۋ ورنىنىڭ بىرەگەيلىگىن تىلگە تيەك ەتتى. ونىڭ جۇمىس ىستەپ تۇرعانىنا كوپ بولعان جوق. 2015 -جىلى عانا اشىلدى. سوعان قاراماستان، بۇگىندە اۋىز تولتىرىپ ايتارلىق جەتىستىكتەرگە جەتتى. ماسەلەن، 3 جىل بۇرىن ءبىر عانا باعدارلاما ەدى. بۇگىندە وقىتۋ 4 باعدارلاما بويىنشا جۇرگىزىلەدى. ال اشىلعان ساتتە نەبارى 20 ستۋدەنت بولسا، بۇگىندە ولاردىڭ سانى 200-دەن اسىپ جىعىلادى.
ايگەرىم بەكەنوۆا، نازاربايەۆ ۋنيۆەرسيتەتى مەديتسينا مەكتەبىنىڭ ستۋدەنتى:
- وسىندا ءبىز شەتەلگە شىقپاي، باتىس ۇلگىسىندە ءبىلىم الۋعا مۇمكىندىگىمىز بار. سونىمەن قاتار شەتەلگە بارساق، مەكتەپتى بىتىرگەن سوڭ باسقا دارىگەرلەرمەن ءبىر دەڭگەيدە جۇمىس ىستەي الامىز، سويلەسە الامىز. ويتكەنى ءبىزدىڭ وقۋىمىز اعىلشىنشا.
مەديتسينا مەكتەبىنىڭ ستۋدەنتتەرى عىلىمي- زەرتتەۋ جۇمىستارىنا جۇمىلدىرىلعان. بۇل رەتتە ولارعا بىرىكتىرىلگەن ۋنيۆەرسيتەت كلينيكاسىنىڭ كوپ كومەگى ءتيىپ جاتىر. ستۋدەنتتەر وقۋ ورنىندا العان ءبىلىمىن وسى اۋرۋحانادا تاجىريبە جۇزىندە جەتىلدىرەدى. ەلباسى جولداۋىندا ايتقانداي، مۇنداي تاجىريبە بارلىق مەديتسينالىق جوعارى وقۋ ورىندارىنا تارالۋى ءتيىس.
www.24.kz
