اقتوبەلىك شەبەر ۇيىندەگى ىدىس- اياقتىڭ ءبارىن اعاشتان جاساپ الدى - فوتو
شەبەر ءوز ۇيىندەگى ىدىستىڭ ءبارىن اعاشتان جاساعان، دەپ حابارلايدى قازاقپارات ءتىلشىسى.
اقتوبە وبلىسى، مارتوك اۋدانىندا تۇراتىن شەبەر ەدىلباي ورازىمبەتوۆ بالالارعا ءدارىس بەرىپ، اعاشتان بۇيىم جاساۋدى ۇيرەتەدى. ءوزى ارنايى ءبىلىم الىپ، وسى سالادا 40 جىلدان بەرى جۇمىس ىستەپ كەلەدى. ءارى بالا كەزدەن قولونەر بۇيىمدارىن جاساۋعا بەيىم، اعاش، تەمىر، تەرىدەن كەز كەلگەن زات قۇراستىرا الادى. ءوز ۇيىندەگى ىدىس- اياقتىڭ ءبارىن اعاشتان جاساپ قويعان.
«ۇيىمدەگى ىدىس- اياقتىڭ ءبارى اعاشتان جاسالعان. سوڭعى كەزدەرى ەت تاباقتارى اعاشتان جاسالىپ، سوعان سۇرانىس اتتى. تاباقتى پايدالاناتىن بولساق، سىرلامايمىز، وڭدەلگەن اعاشتى سول كۇيى كادەگە اسىرادى. سول كەزدە ەتتىڭ ءدامى وزگەشە بولادى. ال سىرلانعان ىدىس- اياق سانگە قويىلادى، كادەسىي رەتىندە ساقتالادى. اعاش بۇيىمدار جاساۋعا ارنالعان شيكىزاتتى كەز كەلگەن جەردەن الۋعا بولادى. اۋلا ىشىندەگى، ورمانداعى قۋراعان، كەسىلگەن اعاشتاردى پايدالانامىز. قاراعاش كوپ، سول بىزگە جەتكىلىكتى»، - دەدى شەبەر ەدىلباي ورازىمبەتوۆ.
اعاش بۇيىمدارىن جاساۋعا ارنالعان شيكىزات، ياعني، اعاشتار بۇرىن مالدىڭ قيىندا ساقتالعان. قي ءبىرقالىپتى تەمپەراتۋرانى ساقتايدى، اعاشتى وڭدەۋگە ىڭعايلى. ال قازىر بۇل ءادىس قولدانىلمايدى. شەبەر ەدىلباي ورازىمبەتوۆ تۇزدى سۋعا اعاشتى سالىپ قويىپ، كەيىن وڭدەۋ ءتاسىلىن پايدالانادى. ول بار بىلگەنى مەن تۇيگەنىن مەكتەپ وقۋشىلارىنا ۇيرەتىپ ءجۇر.
«قازىر بالالاردى قىزىقتىرۋ وتە قيىن. سوڭعى ۋاقىتتا ەر بالالار كەمە ماكەتىن جاسايدى. اعاش وڭدەۋ، جونۋ، كەسۋدىڭ ءبارىن ۇيرەنگەن بالا شىدامدىلىقتى مەڭگەرەدى، ۇقىپتى بولادى. ولار ءار بۇيىمدى جاساۋ تەحنولوگياسىن مەڭگەرىپ، كەيىن ءوز ۇيىنە قاجەتتى بۇيىمدار جاساي الادى. كۇن وتكەن سايىن قىزىعىپ، ۇيىرمەلەلەرگە قاتىساتىن بالالار كوبەيىپ كەلە جاتىر. ءارى بىلگەنىمىزدى ارىپتەستەرىمىزگە ۇيرەتىن، ۇستازداردىڭ بىلىكتىلىگىن ارتتىرۋعا كومەكتەسىپ ءجۇرمىز»، - دەدى شەبەر.
ايتا كەتەيىك، ەدىلباي ورازىمبەتوۆ كوپتەگەن كورمە-جارمەڭكەلەرگە قاتىسىپ ءجۇر. ول سوڭعى جىلدارى قازاقتىڭ ۇلتتىق بۇيىمدارىنا سۇرانىس ارتىپ، تاپسىرىس بەرۋشىلەردىڭ كوبەيگەنىن جاسىرمايدى. قازىر اقتوبەدە اعاش ىدىس- اياقتار سانگە اينالىپ، تۇتىنۋشىلار اراسىندا شەبەرلەرگە تاپسىرىس بەرەتىن ادامداردىڭ قاتارى ارتتى.
