ديزاينەرلەر بايقاۋىنىڭ گران-پري يەگەرى ءوزىنىڭ جەڭىسى تۋرالى ايتىپ بەردى - فوتو
«مەن بايقاۋعا قاتىسقان باسقا دا ۇمىتكەرلەردىڭ ەڭبەگىن كورىپ شىقتىم. وندا شىنىندا دا، بىرەگەي تۋىندىلار اكەلىنگەن ەكەن. ءوزىمنىڭ زايىبىما سولاردىڭ اراسىنان مەنىڭ ەڭبەگىمدى تابا الاسىڭ با دەپ سۇراق قويدىم. جۇبايىم ءبىرىنشى ورىن العان استانالىق مادينا مۇقانوۆانىڭ ەڭبەگىن كورسەتتى. البەتتە، ول مەنىڭ ەڭبەگىم بولماسا دا، شىنايى مىقتى تۋىندىنى زايىبىم بايقاي ءبىلدى. مەن دە باس جۇلدە مادينانىڭ ەنشىسىندە بولار دەپ ويلادىم. وزگەلەر دە بارىن سالعانىمەن، باعدارلامانىڭ ويىن دۇرىس جەتكىزە بىلگەن ەڭبەكتەر جارىپ شىقتى. بالكىم، قاتىسۋشىلاردىڭ كەيبىرى كەرەمەت سۋرەت سالىپ بەرگەن بولار، ءبىراق ديزاينەرلىك دەگەن سۋرەتشىلىك ەمەس. ول دا شىعارماشىل ادام، ءبىراق بوياۋدىڭ حاس شەبەرى ەمەس. بىزدەن ناقتى «رۋحاني جاڭعىرۋ» باعدارلاماسىنىڭ ويىن تۋرا جەتكىزۋ تالاپ ەتىلدى»، - دەيدى دەنيس رومانوۆ.
دەنيس پاۆلودار قالاسىندا تۇرادى. قازىرگى ۋاقىتتا ەۋرازيا ۋنيۆەرسيتەتىنىڭ يننوۆاتسيالىق جارناما جانە ماركەتينگ ورتالىعىنىڭ جەتەكشى مامانى بولىپ ەڭبەك ەتەدى. «قازاقپارات» ح ا ا بايقاۋى تۋرالى تانىسى ارقىلى بىلگەنىن، بايقاۋعا قاتىسۋ ءۇشىن پرەزيدەنتتىڭ «بولاشاققا باعدار: رۋحاني جاڭعىرۋ» ماقالاسىن تولىعىمەن وقىپ شىققانىن ايتادى.
اقىرىندا، دەنيس التى ەسكيز دايىنداپ شىعاردى. بايقاۋدىڭ قورىتىندىسى جاريالانعان سالتاناتتى شارادا ءوز ەڭبەگى تۋرالى قازىلار القاسىنىڭ ويىن ءبىلىپ العان ەكەن. دەنيستىڭ ونەرىن شىنايى باعالاعان ءادىل قازىلار القاسى وعان ارى قاراي ديزاينەرلىك ونەردى دامىتۋعا بولاتىنىن ايتقان. بايقاۋدىڭ شارتى بويىنشا باعدارلامانىڭ بارلىق التى تاراۋىن قامتۋ مىندەتتى ەمەس. تەك سولاردىڭ ءبىرىن تاڭداپ الۋعا بولار ەدى. الايدا پاۆلودارلىق التى بىردەي ەسكيزدى دايىنداۋعا بەل شەشىپتى.
دەنيس سالعان سيمۆولداردىڭ بارلىعىن ءبىر دوڭگەلەنگەن گەومەتريالىق فيگۋرا بايلانىستىرادى. ال ونىڭ ىشىندە گلوبۋس (ەلباسى ماقالاسىندا جازعانداي، جاھاندىق الەم ماعىناسىن بىلدىرەدى) پەن سپيرال (سانانىڭ اشىقتىعى)، شاڭىراق (ۇلتتىق بىرەگەيلىكتى ساقتاۋ)، ماگيسترانتتاردىڭ قالپاعى ء(بىلىم) بەينەلەنگەن. ەڭ قيىنى، دەنيس ءۇشىن سانانىڭ اشىقتىعىن بەرە ءبىلۋ قيىنعا سوققان كورىنەدى. پراگماتيزمنىڭ بەينەسى دە ديزاينەر ءۇشىن وڭايعا تۇسپەگەن.
دەنيس رومانوۆ ءوزىن-ءوزى اسقان شەبەرمىن دەۋدەن اۋلاق. پىكىرىنە قۇلاق اسساق، وعان ەڭ باستىسى تاجىريبە كومەكتەسكەن. ءوزى 10 جىلدان بەرى ديزاينەر بولىپ ەڭبەك ەتەدى. بىرنەشە جىل بويى كليەنتتەرمەن جۇمىس ىستەي وتىرىپ، الدىنا كەلگەن ادامداردىڭ ويىن وقىپ تۇراتىنداي تۋىندىلاردى دۇنيەگە اكەلۋ دەنيستىڭ قولىنان كەلەتىن بولىپ شىقتى.
جەرگىلىكتى وقۋ ورنىندا ستۋدەنت بولىپ ءجۇرىپ- اق، ول جوعارعى وقۋ ورنىندا جۇمىسىن باستاپ كەتكەن.
دەنيسكە سول كەزدىڭ وزىندە ج و و- نىڭ گازەتىن ازىرلەۋ، باننەرلەر مەن بۋكلەتتەردى ساندەۋ، لوگوتيپتەردى ويلاستىرىپ شىعارۋ، فوتو ءتۇسىرىپ وعان مونتاج جاساۋ مىندەتى جۇكتەلىپتى.
ءبىر سوزبەن، اقىل- ويى جۇيرىك ديزاينەردىڭ كومەگىنە كوپ ادام جۇگىنگەن. تاپسىرىستار جەتەرلىك. جەرگىلىكتى «ەرتىس» فۋتبول كومانداسىنان دا ءجيى ۇسىنىستار ءتۇسىپ جاتادى. پاۆلوداردىڭ كوشەلەرىندە رومانوۆ ازىرلەگەن لوگوتيپتەر قالا كوركىنە اينالعان. 2017 -جىلى «استانا» جانە «قايرات» كوماندالارى مەن «اتىراۋ» جانە «قايرات» كوماندالارىنىڭ اراسىنداعى ماتچتاردىڭ باعدارلاماسىن ديزاينەرلىك ۇلگىدە ءدال وسى دەنيس ازىرلەپ بەرگەن.
ەسكە سالا كەتسەك، 21 -جەلتوقسان كۇنى «قازاقپارات» ح ا ا جاريالاعان ديزاينەرلەر بايقاۋىنىڭ جەڭىمپازدارى انىقتالعان بولاتىن. كونكۋرسقا جۇمىستاردى قابىلداۋ 1 -قاراشادان باستالىپ 15 -جەلتوقسانعا دەيىن جالعاسقان ەدى. ۇسىنىلعان جۇمىستار «ءبىلىم كۋلتى»، «باسەكەلىك قابىلەت»، «پراگماتيزم»، «ۇلتتىق بىرەگەيلىكتى ساقتاۋ»، «قازاقستاننىڭ رەۆوليۋتسيالىق ەمەس، ەۆوليۋتسيالىق دامۋى»، «سانانىڭ اشىقتىعى» سەكىلدى تاقىرىپتارعا سايكەس قابىلداندى. ءاربىر قاتىسۋشى نەمەسە ۇجىم اتالعان 6 باعىتتىڭ ءارقايسىسىنا تەك 1 عانا جۇمىسىن ۇسىنۋعا مۇمكىندىك الدى.
بايقاۋدىڭ باس جۇلدەسىن پاۆلودار قالاسىنان كەلگەن دەنيس رومانوۆ جەڭىپ السا، جۇلدەلى ءبىرىنشى ورىنعا يە بولعان نازاربايەۆ ۋنيۆەرسيتەتىنىڭ ستۋدەنتى مادينا مۇقانوۆاعا «قازاقپارات» ح ا ا باس ديرەكتورى اسقار ۋماروۆ 1,5 ميلليون تەڭگەنىڭ سەرتيفيكاتىن تابىس ەتكەن بولاتىن.
ەكىنشى ورىندى (1 ميلليون تەڭگە) پاۆلودار قالاسىنان كەلگەن رۋستام ساريموۆ ۇتىپ السا، ءۇشىنشى ورىن ل. گۋميلەۆ اتىنداعى ە ۇ ۋ ستۋدەنتى ساۋلە جيەنقۇلوۆاعا (500 مىڭ تەڭگە) بۇيىردى.
