قاراعاندىدا وتباسىلىق دەنساۋلىق ورتالىعى اشىلدى
ەرجانوۆ ەوشەسى 28/2 مەكەنجايى بويىنشا ورنالاسقان جاڭا وتباسىلىق دەنساۋلىق ورتالىعى - بۇل №1 -ەمحانانىڭ فيليالى بولىپ تابىلادى. مۇندا كەڭ پروفيلدى دارىگەرلەردىڭ قارالۋىنا كەلىپ، اناليز تاپسىرىپ، رەنتگەن، ۋ د ز(ۋلترادىبىستىق زەرتتەۋ - رەد.) جانە ف گ د (فيبروگاسترودۋدەنوسكوپيا، ياعني اسقازاندى تەكسەرۋ اسپابى) وتۋگە بولادى. جۋىردا جىلجىمالى كەستە بويىنشا مۇندا سالالىق ماماندار قابىلداۋ جۇرگىزەدى. سونىمەن قاتار شاعىن ەمحانا زاماناۋي تەحنيكامەن جانە دارىگەرلەردى قاعازباستىلىقتان ارىلتىپ جۇمىستارىنڭ وڭتايلاندىرۋعا مۇمكىندىك بەرەتىن اقپاراتتىق جۇيەمەن قامتىلعان.
- ءبىزدىڭ ورتالىقتىڭ اشىلۋى ەمحاناداعى دارىگەرلەرىمىزدىڭ جۇمىسىن ءبىرشاما جەڭىلدەتىپ، دارىگەرلەرگە كىرۋگە كەزەكتەردى قىسقارتۋعا مۇمكىندىك بەرەدى. مەنىڭشە ول وتە تاماشا. بىزدە ناۋقاستاردىڭ جايلىلىعى مەن دارىگەرلەر جۇمىسىنىڭ ساپاسىن ارتتىرۋعا بارلىق قاجەتتى جاعداي جاسالعان، - دەدى №1 ەمحانا ديرەكتورى روزا رازييەۆا. قازىردىڭ وزىندە ورتالىققا 20000 ادام تىركەلگەن.
بۇگىن وتباسىلىق دەنساۋلىق ورتالىعىندا قاراعاندى وبلىسىنىڭ اكىمى ەرلان قوشانوۆ بولىپ قايتتى.
- بۇل ورتالىقتى ءبىز مەملەكەتتىك - جەكەشەلىك ارىپتەستىك ءپرينتسيپى بويىنشا اشتىق. ءبىز ءاردايىم بيزنەسمەندەرىمىزدىڭ جۇمىسىنا قولداۋ كورسەتەمىز. ولار ءۇشىن جاعداي جاساپ، ءتۇرلى ماسەلەلەردى شەشەمىز، ۇزاقمەرزىمدى مەملەكەتتىك تاپسىرىس بەرەمىز. وسىلايشا، بيزنەس سەنىمدى سەرىكتەس رەتىندە مەملەكەتپەن قىزمەت ەتەدى. بۇل مەملەكەت ءۇشىن دە، كاسىپكەرلەر ءۇشىن دە ءتيىمدى. بۇگىنگى تاڭدا ءبىز م ج س جەلىسى بويىنشا 21 جوبانى ىسكە اسىردىق. بۇل ەلىمىز بويىنشا ۇزدىك كورسەتكىشتەر. وسىنداي ارىپتەستىكتىڭ ارقاسىندا ءبىز كوپتەگەن الەۋمەتتىك ماسەلەلەردى شەشتىك. ەگەر وسىنىڭ بارلىعى بيزنەستىڭ كومەگىنسىز شەشىلەر بولسا، بىرنەشە جىلعا سوزىلىپ كەتەر ەدى، - دەدى ول.
ايتا كەتكەن ءجون، ينۆەستور ورتالىقتىڭ قۇرىلىسىنا 400 ميلليون تەڭگە جاراتقان.
