الماتى قۇراماسى قىسقى سپارتاكيادادا جەڭىسكە جەتتى

سپارتاكيادا - ءتورت جىلدا ءبىر ۇيىمداستىرىلاتىن جارىس. ونىڭ باستى ماقساتى سالاۋاتتى ءومىر سالتىن ناسيحاتتاپ، قازاقستاننىڭ ۇزدىك سپورتشىلارىن انىقتاۋ جانە ۇلتتىق قۇرامانىڭ تولاعايلارىن حالىقارالىق جارىستارعا دايىنداۋ.

 بيىلعى جارىس قىسقى سپورتتىڭ 17 تۇرىنەن وتكىزىلدى. ونىڭ 7 ەۋى الماتىدا ءوتتى. ولار: شورت-ترەك، كەرلينگ، قىزدار اراسىنداعى شايبالى حوككەي، فريستايل، شاڭعى قوسسايىسى، شاڭعىمەن تۇعىردان سەكىرۋ، تاۋ- شاڭعى سپورتى.

سپارتاكيادانىڭ قورىتىندىسى بويىنشا، الماتى قۇراماسىنىڭ سپورتشىلارى جالپى كوماندالىق ەسەپتە 571 ۇپاي جيناپ، جەڭىسكە جەتسە، شىعىس قازاقستان وبلىسىنىڭ كومانداسى 558 ۇپايمەن ەكىنشى ورىنعا جايعاستى. ال قولا جۇلدەنى 388 ۇپايمەن استانا قالاسىنىڭ سپورتشىلارى قانجىعاسىنا بايلادى.

ايتا كەتەر جايت، بۇل سپارتاكيادا قازاقستاننىڭ 14 كومانداسىنىڭ قاتىسۋىمەن ەلىمىزدىڭ التى قالاسى جانە وبلىستارىندا وتكىزىلگەن بولاتىن.

كوماندالار جيناعان ۇپايلارى ارقىلى رەت-رەتىمەن كەلەسى ورىندارعا جايعاستى:

الماتى (357)، سولتۇستىك قازاقستان (353)، اقمولا (267)، قاراعاندى (205)، قوستاناي (148)، اقتوبە (140)، پاۆلودار (122)، باتىس قازاقستان (102)، جامبىل (86)، وڭتۇستىك قازاقستان (65) جانە ماڭعىستاۋ (56) وبلىستارى.

ەستەرىڭىزگە سالا كەتسەك، الدىندا وتكەن 3 سپارتاكيادادا شىعىس قازاقستان وبلىسىنىڭ سپورتشىلارى قاتارىنان جەڭىمپاز اتانعان بولاتىن. وسى جولى الماتىلىقتاردان تەك 13 ۇپاي ۇتىلىپ، ەكىنشى ورىن الدى.

اۆتور:   كۇنسۇلتان وتارباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى