قىزىلوردادان ورالعا ەسىرتكى تاسىمالداعاندار ۇزاق مەرزىمگە سوتتالدى
سوت ءتوراعاسى قايرات شالقاروۆتىڭ ايتۋىنشا، سوت تالقىسىندا بەلگىلى بولعانىنداي، ايبەك سىزدىق شامامەن بيىلعى قىركۇيەك ايىندا سىرداريا وزەنىنىڭ جاعاسىنان قاراسورانى جيناپ الىپ، ۇيىنە اكەلىپ، كەپتىرىپ، جەتى قوراپقا سالعان. سودان كەيىن قىزىلوردا قالاسىندا ءوزىنىڭ تانىسى جومارت قالدىجىگىتكە جولىعىپ، ونىمەن ءىرى كولەمدە ەسىرتكى تاسىمالداۋ جونىندە ءسوز بايلاسقان. ەسىرتكىنى ءوز اۆتوكولىگىمەن جەتكىزۋ ءۇشىن ج. قالدىجىگىت ا. سىزدىقتان 250 مىڭ تەڭگەنى الدىن الا العان. 7- قازان كۇنى ەكەۋى «تويوتا لەند كرۋزەر-100» كولىگىمەن قالا سىرتىنا شىعىپ، ا. سىزدىق ەسىرتكىنى اۆتوموبيلگە جاسىرعان. سوسىن قىزىلورداعا قايتىپ ورالىپ، ساپارلاس رەتىندە د. قايۋپوۆتى الىپ، ورالعا جول تارتقان. 8- قازان كۇنى كەشكىسىن سامارا-شىمكەنت جولى بويىندا، ب ق و- نىڭ سىرىم اۋدانى اۋماعىندا اۆتوكولىكتى جول پوليتسياسى قىزمەتكەرلەرى توقتاتىپ، تەكسەرگەن كەزدە 6982,15 گرام (7 كەلىگە جۋىق) كەپتىرىلگەن ماريحۋانا تابىلعان.
سوت ۇكىمىمەن ا. سىزدىق ق ر ق ك 297-بابى 3-بولىگى 1, 3-تارماعىمەن ايىپتى دەپ تانىلىپ، وعان مۇلكىن تاركىلەۋمەن بىرگە 11 جىل باس بوستاندىعىنان ايىرۋ جازاسى كەسىلدى. سونىمەن قاتار ق ك 60-بابى 1-بولىگى نەگىزىندە وتەلمەگەن جازاسى قوسىلىپ، تۇپكىلىكتى 11 جىل 6 اي مەرزىم بەلگىلەندى. ج. قالدىجىگىت تە ق ر ق ك 297-بابى 3-بولىگى 1, 3-تارماعى نەگىزىندە مۇلكىن تاركىلەۋمەن بىرگە 10 جىلعا سوتتالدى.
ق ر ق ك 14-بابى 2-بولىگى 2-تارماعىنا سايكەس ا. سىزدىق پەن ج. قالدىجىگىتتىڭ قىلمىسى قاۋىپتى ەكەندىگى ەسكەرىلىپ، ولارعا جازانى قاۋىپسىزدىگى توتەنشە قىلمىستىق-اتقارۋ جۇيەسى مەكەمەسىندە وتەۋ بەلگىلەندى.
سوت ۇكىمى زاڭدى كۇشىنە ەنگەن جوق.
