ادام ەسىمىنىڭ تاعدىرىنا اسەر ەتەتىنى راس پا؟
ءبىرىنشى كەزەكتە، ەسىمدەگى دىبىستاردىڭ ءوزارا ۇيلەسىمدى ەستىلۋى ماڭىزدى. وسى دىبىستار ادامعا جاعىمدى نەمەسە جاعىمسىز اسەر سىيلايدى. ول اسەرلەر - ماقتانىش، قۇرمەت، باقىت جانە ۇيات بولۋى مۇمكىن. ەسىمىن ۇناتاتىن جاندار، ونى ەرەكشە ماقتانىشپەن ايتادى. ال ەسىمىن وزىنە لايىق كورمەيتىن ادامدار، وزگەلەرگە قىزعانىشپەن قارايدى. ءتىپتى، تانىستىق كەزىندە لاقاپ ەسىمدەرىن ايتۋلارى دا عاجاپ ەمەس.
ءاربىر جاڭا تۋعان سابيگە ادامزات تاعدىرىندا كەزدەسپەگەن ەسىمدى بەرۋ قيىن. ياعني سابيگە كوبىنەسە ۇجىمدىق بەيسانادا بار ەسىم بەرىلەدى. ال سول ۇجىمدىق بەيساناداعى ەسىم - تاريحتاعى تانىمال تۇلعا نەمەسە تۋىستار مەن دوستار اراسىنداعى بەدەلدى ادام. رەسەي مەن ەۋروپا ەلدەرىندە ۇلكەن اۋلەتتە ءبىر پاتشانىڭ ەسىمى بىرنەشە رەت قايتالانىپ قويىلۋى مۇمكىن. قازاق قوعامىندا مۇنداي ءۇردىس سيرەك كەزدەسەدى. دەسە دە، جوق ەمەس. مىسالى، ءابىلمانسۇر حان ارعى اتاسى قانىشەر ابىلايدىڭ اتىن جەكپە- جەكتە ۇران ەتكەن سوڭ- اق وسى اتپەن تاريحتا قالدى.
باستاپقىدا اتا- بابالارىمىزدىڭ ەسىمى تىكەلەي تابيعاتپەن جانە تابيعاتتا بولىپ جاتقان قۇبىلىستارمەن بايلانىستى بولعان. ۋاقىت وتە كەلە ەسىمدەر دە، ولاردىڭ بىلدىرەتىن ماعىنالارى دا وزگەرە باستادى. دەسە دە، ءار ەسىمنىڭ استارىندا ەرتەرەكتەن بەرى ساقتالىپ كەلە جاتقان ماعىناسى بار. فرانتسيالىق يۋنگ باعىتىنداعى پسيحواناليتيك، گرۋپپاناليتيك، سۋپەرۆيزور، Phd دوكتور نوربەرت شاتيلون ەسىمنىڭ ماعىناسىنا اسا ءمان بەرمەيتىنىن ايتادى. ياعني ەسىمنىڭ تاعدىرىنا قالاي اسەر ەتەتىنى تەك سول ادامنىڭ سەنىمىنە بايلانىستى.
«ءوزىڭ تىنىس- تىرشىلىگىن تولىق تانىپ بىلمەگەن حالىقتىڭ سانا- سەزىمىنە، سالت- داستۇرىنە قاتىستى پىكىر ءبىلدىرۋ وتە قيىن. ارينە، پسيحواناليتيك ماماندارعا ورتاق بەلگىلى ءبىر زاڭدىلىقتار بار. مىسالى، ءبىز شىندىق قانداي بولسا دا، وعان تۋرا قاراۋعا داعدىلانعانبىز. ياعني ول جەردە دىنگە، سالت- داستۇرگە، ىرىم- تىيىمدارعا ورىن جوق. مەنىڭشە، ەسىم ادام تاعدىرىنا تەك ءبىر جاعدايدا اسەر ەتەدى. قازاقستاندا تۇراقتاپ قالماسام دا، كوپ جىلدان بەرى اراسىندا بارىپ تۇرامىن. قوس ەلدىڭ مادەني وزگەشىلىكتەرىن دە بايقاپ ءجۇرمىن. ايتايىن دەگەنىم، ەگەر سىزدەر ەسىمنىڭ ادام تاعدىرىنا اسەرى بار ەكەنىنە سەنسەڭىزدەر، راسىمەن دە، سولاي بولىپ شىعادى. مۇنى قۇدىرەتتى كۇش دەپ ءتۇسىنۋدىڭ قاجەتى جوق. بار بولعانى، مۇندا ادام ويىنىڭ كۇشى باسىم بولىپ تۇر»، - دەيدى مامان.
پسيحواناليتيك نوربەرت شاتيلون ايتىپ وتىرعان «ويدىڭ كۇشى» ۇعىمىن العىشقىلاردىڭ ءبىرى بولىپ نەيروفيزيولوگ دجو ديسپەنزا مەن تانىمال كانادالىق جازۋشى، فيلانتروپ دجون كەحو عىلىمي اينالىمعا ەنگىزگەن. العاشقىسى ميدىڭ شىنايى ءومىر مەن ويداعى قيالدى ءوزارا اجىراتا المايتىنىن دالەلدەگەن: نەيروفيزيولوگ (دجو ديسپەنزا) مامان ءوزىن كولىك قاعىپ كەتكەننەن كەيىن توسەك تارتىپ جاتىپ قالادى. دارىگەرلەر الداعى ۋاقىتتا ونىڭ تەك يمپلانتتاردىڭ كومەگىمەن قوزعالا الاتىنىن ايتادى. دەسە دە، مامان كۇردەلى وتالاردان باس تارتىپ، ءوزىن نەبارى 9 ايدا «ويدىڭ قۇدىرەتىمەن» ەمدەپ جازادى. بۇگىندە ديسپەنزانىڭ ويدىڭ قۇدىرەتىنە قاتىستى بىرنەشە ەڭبەگى بار. ياعني نوربەرت شاتيلون مىرزانىڭ ايتۋىنشا، ءدال وسى ويدىڭ قۇدىرەتى ارقىلى ءوزىمىزدى قالاعان «شىندىققا» سەندىرە الامىز.
فرانتسيالىق ماماننىڭ پىكىرىن يتاليالىق ارىپتەسى دە قوشتاپ وتىر. حالىقارالىق پسيحواناليتيكتەر اسسوتسياتسياسىنىڭ مۇشەسى، Phd دوكتور، يتاليالىق پسيحواناليتيك مانۋەل مارتينەز دە ەسىمنىڭ ادام تاعدىرىنا تەك ءبىر جاعدايدا اسەر ەتەتىنىن ايتادى.
«قازاقتار مەن يتاليالىقتاردىڭ كەي سالت- داستۇرىندە ۇقساستىق بارىن بايقاپ ءجۇرمىن. (كۇلدى.) مىسالى، مەنىڭ اكەم دە انامدى الىپ قاشىپ ۇيلەنگەن بولاتىن. سىزدەردىڭ قىز الىپ قاشۋ داستۇرلەرىڭىز وسى وقيعانى ەسكە ءتۇسىرىپ وتىر. وكىنىشكە وراي، مۇنداي ءداستۇردىڭ كەمشى تۇستارى دا بار ەكەن. قىزدى ءوز ەركىنەن تىس الىپ قاشقان ادامداردى حايۋانعا تەڭەر ەدىم. ال ەسىم ماسەلەسىنە كەلەتىن بولساق، مەنىڭشە، ول ادام تاعدىرىنا مۇلدەم اسەر ەتپەيدى. ءبىراق، ءبىر تايپاداعى، قاۋىمداستىقتاعى نەمەسە مەملەكەتتەگى تۇرعىندار ەسىمنىڭ ادام تاعدىرىنا اسەر ەتەتىنىنە كامىل سەنەتىن بولسا، بۇل پىكىردى قۋاتتايتىن فاكتورلار مىندەتتى تۇردە تابىلادى. ياعني ادام ويىنىڭ كۇشى ەرەكشە قۇدىرەتكە يە. بۇل عىلىممەن دالەلدەنگەن»، - دەيدى مامان.
قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ەرجان قاجى مالعاجى ۇلى ءوزىنىڭ «ءدىن مەن ءداستۇر» كىتابىنىڭ ەكىنشى تومىندا «ازان شاقىرىپ ات قويۋدىڭ ماڭىزى قانداي؟»، «تۋعان سابيگە قاشان ات قويىلادى؟»، «نارەستەگە ات قويۋعا كىم قۇقىلى؟» سىندى ساۋالدارعا جاۋاپ بەرەدى. ياعني باس ءمۇفتيدىڭ پىكىرىنشە، كەرىسىنشە ەسىمنىڭ ادام تاعدىرىنا تىكەلەي اسەرى بار. سول سەبەپتى، سابيگە ەسىم قويار كەزدە مۇقيات بولۋ كەرەك.
ەرجان قاجى مالعاجى ۇلى اتالعان كىتابىندا شاريعات تۇرعىسىنان تىيىم سالىنعان ەسىمدەردى اتاپ كورسەتىپ، سەبەبىن جازىپ وتكەن. ولار تومەندەگىدەي:
ا) «قۇل» دەگەن ماعىنانى بىلدىرەتىن «ابدۋن» ءسوزىن اللا تاعالانىڭ ەسىمى مەن سيپاتتارىنان باسقا اتاۋلارعا تىركەۋگە بولمايدى. مىسالى، ابدۋلۋززا - «ۋززانىڭ قۇلى»، ابدۋلقاعبا - «قاعبانىڭ قۇلى» دەگەن سياقتى ەسىمدەر.
ءا) اللا تاعالانىڭ كوركەم ەسىمدەرىن سول كۇيىندە بالاعا ەسىم ەتىپ بەرۋگە بولمايدى. مىسالى، اللا، راح- مان، حاليق، احاد، رازيق، ءباريي، راببى دەگەن سياقتى.
ب) جىن- شايتانداردىڭ، كاپىرلەردىڭ، دىنسىزدەردىڭ كوسەمدەرى مەن ت. ب. حالىق اراسىندا جامان جاعىنان تانىلعان كىسىلەردىڭ اتتارىن قويۋ دا مۇسىلمان بالاسى ءۇشىن دۇرىس ەمەس. مىسالى، ءىبىلىس، يفريت، پەرعاۋىن، ھامان، جالۇت، ءاجۇج، ءماجۇج، حوسراۋ، تسەزار، لەنين، ستالين، ەنگەلس، ماركس، تەلمان، دارۆين، كوممۋنا، پارتيا ت. ب.
ۆ) سونىمەن قاتار «پاتشالاردىڭ پاتشاسى»، «اكىمدەردىڭ اكىمى»، «سۇلتانداردىڭ سۇلتانى» دەگەن ماعىنالاردى بىلدىرەتىن ەسىمدەر.
ساحابا ءابۋ ھۋرايرا- دان جەتكەن ريۋاياتتا پايعامبار (س. ا. ۋ. ): «اللانىڭ الدىندا ەسىمدەردىڭ ەڭ ناشارى - «پاتشالاردىڭ پاتشاسى»، - دەگەن.
ۋكراينالىق پسيحواناليتيك، كلينيكالىق پسيحولوگيا مامانى ناتاليا ترۋتەنكو سابيگە قويىلعان ەسىمنەن بۇرىن، اتا- اناسىنىڭ تاربيەسى كوبىرەك اسەر ەتەتىنىن ايتادى. وسى تۇستا مامان فرانسيالىق ارىپتەستەرىنىڭ پىكىرىن مىسالعا كەلتىردى.
«فرانسيا پسيحواناليتيكتەرىنىڭ ايتۋىنشا، جۇپتار بەيسانالى دەڭگەيدە بولاشاق سابيلەرىنىڭ وبرازىن الدىن الا ويلاستىرىپ قويادى. اسىرەسە، ايەل قاۋىمى جاتىرىنداعى ءسابيدىڭ بولاشاعىن كوز الدىنا كوبىرەك ەلەستەتەدى. ءتىپتى، اتا- انالاردىڭ سابيلەرىنە بەرگەن ەسىمدەرىنە قاراپ، ولاردىڭ پەرزەنتتەرىنە قانداي ءۇمىت ارتقاندارىن بىلۋگە بولادى. مۇنىڭ بارلىعى بالاعا اسەر ەتپەي قويمايدى. سەبەبى، بالا «گۋبكا» سەكىلدى اتا-اناسىنىڭ ايتقاندارىن سانالى جانە بەيسانالى دەڭگەيدە وزىنە ءسىڭىرىپ وتىرادى. بالادا سىني كوزقاراس بىردەن دامىمايتىندىقتان، كوپكە دەيىن اتا- اناسىنىڭ ورىنسىز قالاۋلارىنا قارسى شىعا المايدى. مىسالى، مىنەزىنە لايىق ەسىم قويىلماسا، بالا قۇرداستارىنان ءوزىن كەم سانايدى. اتا-اناسى بالاسىن بار قالپىندا قابىلداعان كەزدە عانا كەيىنگىلەر سەزىمدەرىن ەركىن كورسەتىپ، مۇمكىندىكتەردى پايدالانىپ، باقىتتى بولادى. ياعني ەسىمدە تۇرعان ەشنارسە جوق. باستىسى - اتا-اناسىنىڭ بالاسىنا دەگەن قارىم- قاتىناسى»، - دەيدى مامان.
بۇدان وزگە «ەسىمنىڭ ادام تاعدىرىنا تىكەلەي اسەرى بار» دەگەن پىكىردى قوشتاپ جۇرگەن عىلىم - نۋمەرولوگيا. Numeroscop.ru سايتىنان الىنعان مالىمەتتەرگە سۇيەنسەك، ادام ەسىمى ارقىلى ونىڭ مىنەز-قۇلىق، تۋابىتكەن قاسيەتتەر، ەنەرگەتيكا مەن تەمپەرامەنتى تۋرالى اقپاراتتار الۋعا بولادى.
ال ءسىز، قۇرمەتتى وقىرمان، ەسىمنىڭ ادام تاعدىرىنا اسەر ەتەتىنىنە سەنەسىز بە؟
قارلىعا بۇيەنباي
islam.kz
