ينۆەستورلار ءۇشىن جەردى الۋ جۇمىسى جەڭىلدەي تۇسەدى
وسىعان وراي، ق ر ينۆەستيتسيالار جانە دامۋ ۆيتسە-ءمينيسترى ەرلان قايىروۆتىڭ پارلامەنت ءماجىلىسىنىڭ دەپۋتاتتارىنا ارنايى زاڭ جوباسىن تانىستىردى، دەپ حابارلايدى قازاقپارات ءتىلشىسى.
ونىڭ ايتۋىنشا، اتالعان قۇجاتتىڭ باستى جاڭالىعى، ينۆەستورلار بۇرىنعىداي جەردى الۋ ءۇشىن كوپ جۇگىرمەيدى. مەملەكەتتىك ورگانداردىڭ تابالدىرىعىن دا توزدىرمايدى.
«قازىرگى جۇيەگە سايكەس، ارنايى ەكونوميكالىق ايماقتاردا جەردى بەرۋ شارالارى 6-9 ايعا سوزىلادى. ينۆەستور بىردەن اكىمدىككە جىبەرەدى. سول جەردە كوميسسيا وتىرىستارى، قۇجاتتارعا ۆيزا جيناۋ، كەلىسۋ جانە تاعى باسقا ماشاقاتتار كوپ. ءبىز ەندى بىلاي جۇمىس جاسايمىز، جەر باسقارۋشى كومپانياعا بەرىلەدى. كومپانيا ءوز كەزەگىندە ارنايى ەكونوميكالىق ايماقتىڭ قىزمەتىنە قاراي جەردى سالا-سالا بويىنشا بولەدى دە، ونى ينۆەستورلارعا ۇسىنادى. وسىنىڭ ارقاسىندا جوبانى ۇزاققا سوزباي، بىردەن ىسكە اسىرۋعا بولادى. ايتپەسە، قازىر بارلىق قۇجاتتاردى الىپ، جەردى تولىعىمەن دايىنداۋعا 1,5-2 جىلداي ۋاقىت كەتەدى. ول ۋاقىتتىڭ ىشىندە نارىقتا شيكىزاتتىڭ باعاسى وزگەرىپ، جوبانىڭ تيىمدىلىگى تومەندەيدى»، - دەيدى ە. قايىروۆ.
بۇدان بولەك، ارنايى ەكونوميكالىق جانە يندۋستريالدىق ايماقتاردىڭ باسقارۋشى كومپانيالارىن بارىنشا كۇشەيتىپ، مۇلىك سالىعىنان بوساتۋ جوسپارلانىپ وتىر. ايماقتاردىڭ قىزمەتىنە قاتىستى باسىم باعىتتاردى انىقتاۋ شارالارى دا جەڭىلدەي تۇسەدى. ەندى، ول باعىتتاردىڭ ءتىزىمى قر ينۆەستيتسيالار جانە دامۋ ءمينيسترىنىڭ بۇيرىعىمەن بەكىتىلەدى. سالىق جاعىنان ءبىرقاتار جەڭىلدىكتەر دە جاسالادى.
«ءبىزدىڭ جوسپارىمىزعا سايكەس، 2018-جىلدان باستاپ ارنايى ەكونوميكالىق جانە يندۋستريالدىق ايماقتاردا، كەم دەگەندە، 100 ميلليارد تەڭگەنىڭ جوبالارى قولعا الىنادى. ال 2020-جىلدىڭ اياعىنا دەيىن ونداي جەرلەردە 20 مىڭ جۇمىس ورنى قۇرىلۋى قاجەت»، - دەپ اتاپ كورسەتتى ە. قايىروۆ.
رەسمي مالىمەتكە سايكەس، بۇگىندە قازاقستاندا 11 ارنايى ەكونوميكالىق جانە 22 يندۋستريالدىق ايماق بار. بارلىعىندا 271 ينۆەستيتسيالىق جوبا قولعا الىندى.
ايتا كەتەيىك، زاڭ جوباسىن تانىستىرۋ بارىسىندا دەپۋتات باقتيار ماكەن «الاتاۋ» پاركىنىڭ ماسەلەسىن تاعى كوتەردى.
«ءالى ەسىمدە، ادەمى ستەندتەردى كورسەتىپ، ءبىراز جەتىستىكتەرگە جەتتىك دەپ ماقتانادى. مىنە، يننوۆاتسيالار دەيدى. تەلەديداردان دا كورسەتىپ جاتادى. ارتىنان ەشقانداي جاۋاپكەرشىلىك بولمايدى»، - دەپ اتاپ كورسەتتى ب. ماكەن.
