سەرىك ساپيەۆ اتىراۋ سپورتشىلارىنىڭ جاڭاجىلدىق ەستافەتاسىنا قوسىلدى
وليمپيادا چەمپيونى ءارى ق ر پارلامەنتى ءماجىلىسىنىڭ دەپۋتاتى بارشا قازاقستاندىق سپورتشىلارعا ۆيدەوجولداۋ ارناپ، اتىراۋدان باستالعان ەرەكشە مەرەكەلىك ەستافەتاعا قوسىلدى.
«شىرشانى ءوز مەدالدارىمەن بەزەندىرىپ، اتىراۋلىق سپورتشىلار باستاعان چەمپيوندىق چەللەندجىگە قولداۋ بىلدىرەيىن دەپ شەشتىم. مەملەكەت باسشىسى ۇنەمى سپورتتى ناسيحاتتاۋ قاجەتتىگىن ايتادى، مۇنداي شارالار سول مۇددەگە قىزمەت ەتەدى. ەستافەتانى بارشا سپورتشىلارعا جولداپ، ونىڭ ۇزاققا جالعاسۋىن تىلەيمىن»، - دەدى سەرىك ساپيەۆ.
ەسكە سالا كەتسەك، چەمپيون شىرشاسىن العاش رەت 24- جەلتوقسان كۇنى اتىراۋ سپورتشىلارى مەدالدارىمەن بەزەندىرگەن بولاتىن. 26- جەلتوقساندا قاراعاندىلىق سپورتشىلار ونى جالعاستىردى، 27- جەلتوقساندا يگى ءراسىمدى وليمپيادا چەمپيونى سەرىك ساپيەۆ قابىلدادى. اتىراۋلىق سپورتشىلاردىڭ باستاماسىنا بەلگىلى بىلعارى قولعاپ شەبەرى ماديار اشكەيەۆ تە قولداۋ ءبىلدىردى. سپورتشى ا ق ش- تىڭ لوس-اندجەلەس قالاسىنداعى شىرشالاردىڭ بىرىنە قازاقستاننىڭ مەملەكەتتىك تۋىن جاۋىپ، ەستافەتانى سەرىك ساپيەۆتەن قابىلدادى.
