قازاقستان مەن تۇرىكمەنستان وا ەلدەرى ىشىندە شەكارا شەگەندەۋدى ءبىرىنشى اياقتادى - س ءى م
اتالعان زاڭ جوباسى بويىنشا نەگىزگى بايانداما جاساعان ق ر سىرتقى ىستەر ءمينيسترى قايرات ءابدىراحمانوۆتىڭ ايتۋىنشا، قازاقستان مەن تۇرىكمەنستان اراسىنداعى قازاقستان- تۇرىكمەن مەملەكەتتىك شەكاراسىن شەگەندەۋ تۋرالى كەلىسىمگە 2017 -جىلعى ساۋىردە استانادا ەكى ەلدىڭ پرەزيدەنتتەرى قول قويعان.
«قازاقستان مەن تۇرىكمەنستان ورتالىق ازيا ەلدەرى ىشىندە شەكارا شەگەندەۋدى ءبىرىنشى بولىپ اياقتاعانىن اتاپ وتكىم كەلەدى. قازاقستان- تۇرىكمەن مەملەكەتتىك شەكاراسىن شەگەندەۋ 2001 -جىلعى 5 - شىلدەدەگى قازاقستان مەن تۇرىكمەنستان اراسىنداعى قازاقستان- تۇرىكمەنستان شەكاراسىن دەليميتاتسيالاۋ جانە ونى دەماركاتسيالاۋ پروتسەسى تۋرالى شارتقا سايكەس جۇرگىزىلدى. بۇل شارت قازاقستان رەسپۋبليكاسىنىڭ 2003 -جىلعى 2 - شىلدەدەگى زاڭىمەن راتيفيكاتسيالاۋعا ءتۇستى جانە 2006 -جىلعى 31 - تامىزدا كۇشىنە ەندى»، - دەدى ول.
ءمينيستردىڭ ايتۋىنشا، كەلىسىمنىڭ باستى ماقساتى - قازاقستان مەن تۇرىكمەنستان اراسىنداعى شەگەندەلگەن مەملەكەتتىك شەكارا سىزىعىن حالىقارالىق قۇقىقتىق بەكىتۋ. شەكارانى شەگەندەۋ ناتيجەسىندە مەملەكەتتىك شەكارا سىزىعىنىڭ ۇزىندىعى 458,3 شاقىرىمدى قۇرادى. مەملەكەتتىك شەكارا سىزىعىندا 30 شەكارالىق بەلگى ورناتىلدى. مەملەكەتتىك شەكارا جانە شەكارالىق بەلگىلەردىڭ ورنالاسقان جەرى كەلىسىمگە كەلەسى قوسىمشالاردا، اتاپ ايتقاندا، مەملەكەتتىك شەكارا سىزىعىنىڭ ءوتۋىن قامتاماسىز ەتۋ حاتتاماسىندا، مەملەكەتتىك شەكارا كارتاسىندا، شەكارالىق بەلگىلەردىڭ حاتتامالارىندا، شەكارالىق بەلگىلەردىڭ كوورديناتتارى مەن بيىكتىكتەرىنىڭ كاتولوگىندا كورسەتىلگەن.
«كەلىسىم كۇشىنە ەنگەننەن كەيىن مەملەكەتتىك شەكارا سىزىعىن ءتيىستى كۇيدە ساقتاۋ ماقساتىندا شەكارانىڭ بەلگىلەنۋى 10جىلدا ءبىر رەت بىرلەسكەن تەكسەرۋدەن وتەدى. كەلىسىم بويىنشا جەرگىلىكتى جەردەگى كەز كەلگەن وزگەرىستەر مەملەكەتتىك شەكارا سىزىعىنىڭ وتۋىندەگى وزگەرىستەرگە الىپ كەلمەيدى. كەلىسىمنىڭ ەرەجەلەرىنە سايكەس ول راتيفيكساتسيالاۋعا جاتادى جانە ديپلوماتيالىق ارنالار ارقىلى ونىڭ اياقتالعانى تۋرالى جازباشا حابارلاما الىنعان كۇننەن باستاپ كۇشىنە ەنەدى»، - دەدى قايرات ءابدىراحمانوۆ.
سەناتورلار قۇجاتتى ءبىراۋىزدان قولداپ، سەناتتىڭ اتالعان زاڭدى قابىلداۋ تۋرالى قاۋلىسى قابىلداندى.
اۆتور: مارلان جيەمباي
