اكادەميك قابي وقايەۆ ومىردەن ءوتتى
ۋنيۆەرسيتەت باسپا ءسوز قىزمەتى كەلتىرگەن دەرەك بويىنشا، قازاقستاننىڭ ەڭبەك سىڭىرگەن قىزمەتكەرى، قازاقستان رەسپۋبليكاسى جوعارى مەكتەبى عىلىم اكادەمياسىنىڭ اكادەميگى، ەكونوميكا عىلىمدارىنىڭ دوكتورى، پروفەسسور قابي وقا ۇلى وقايەۆ 2017 -جىلدىڭ 22 - جەلتوقسانىندا ومىردەن وتكەن.
قابي وقا ۇلى ءوزىنىڭ ەرەكشە ەڭبەكقورلىعى، تەرەڭ ءبىلىمى، ايرىقشا اقىل- پاراساتى مەن تاماشا ۇيىمداستىرۋشىلىق قابىلەتىنىڭ ارقاسىندا ءبىلىم مەن عىلىمنىڭ ۇشار شىڭىنان كورىنە ءبىلدى.
قازاقستانداعى العاشقى ەكونوميكالىق جوعارى وقۋ ورنى - الماتى حالىق شارۋاشىلىعى ينستيتۋتىنىڭ (قازىرگى نارحوز ۋنيۆەرسيتەتىنىڭ) نەگىزىن قالاۋشىلاردىڭ ءبىرى رەتىندە ول جيىرما جىلدان استام ۋاقىت بويى ا ح ش ي- ءدىڭ جوسپارلاۋ ەكونوميكاسى جانە ەسەپ ەكونوميكاسى فاكۋلتەتتەرىن باسقاردى. وتىز جىل بويىنا (1975-2005 -جىلدارى) ۇزدىكسىز «ەكونوميكا» كافەدراسىنىڭ مەڭگەرۋشىسى بولدى.
عىلىمي قاۋىمداستىق اراسىندا قابي وقا ۇلى نەگىزگى كاپيتال، ونەركاسىپ پەن كاسىپكەرلىكتىڭ دامۋى، ەكونوميكانى باسقارۋدىڭ شارۋاشىلىقتىق مەحانيزمى سەكىلدى وزەكتى ماسەلەلەردى تەرەڭ زەرتتەۋشى عالىم رەتىندە تانىلدى.
قابي وقا ۇلى - عىلىم مەن ءبىلىم بەرۋ جۇيەسىنە ەلەۋلى ەڭبەك سىڭىرگەن بەلگىلى تۇلعا. ول قازاقستان رەسپۋبليكاسى ءبىلىم جانە عىلىم مينيسترلىگىنىڭ وقۋ- ادىستەمەلىك بىرلەستىگىنىڭ تۇڭعىش جەتەكشىلەرىنىڭ ءبىرى، ەكونوميكالىق جوعارى وقۋ ورىندارىنىڭ ستۋدەنتتەرىنە ارنالعان ىسكەرلىك ەكونوميكالىق ويىندار ادىستەمەسىنىڭ اۆتورى، ونى قازاقستاندا العاشقى ۇيىمداستىرۋشى جانە قولدانىسقا ەنگىزۋشى، قازاق ەنسيكلوپەدياسىنىڭ ەكونوميكا بويىنشا رەداكسيالىق كەڭەسىنىڭ ءتوراعاسى، قازاقستان رەسپۋبليكاسىنىڭ عىلىمي كادرلاردى اتتەستاتتاۋ جونىندەگى دەپارتامەنتىنىڭ ەكونوميكالىق عىلىمدار بويىنشا ەكسپەرتتىك كەڭەسىنىڭ ءتوراعاسى بولدى.
ونىڭ جەمىستى جەتەكشىلىگىنىڭ ناتيجەسىندە ەلىمىزگە بەلگىلى مەملەكەت جانە قوعام قايراتكەرلەرىنىڭ تۇتاس شوعىرى قالىپتاستى، ولار ۇلتتىق ەكونوميكانىڭ دامۋىنا زور ۇلەس قوسۋدا.
