قازاقستاندىق عارىش سپۋتنيكتەرى ارقىلى بوراندا جولدا قالعانداردى قۇتقارۋعا بولادى

ەلىمىزدەگى عارىش سپۋتنيكتەرىنىڭ بىرەگەي مۇمكىندىكتەرى جايلى استاناداعى ۇلتتىق عارىش ورتالىعىندا ق ر قورعانىس جانە ايەروعارىش ونەركاسىبى ءمينيسترى بەيبىت اتامقۇلوۆ بايان ەتتى، دەپ حابارلايدى «قازاقپارات» ح ا ا ءتىلشىسى.

«ءبىزدىڭ ەلىمىزدە 60 ديففەرەنتسيالدى ستانسا بار. وسى ستانسالار ارقىلى موبيلدى تەلەفونداردىڭ قايدا ورنالاسقانىن انىقتاۋعا بولادى. ديففەرەنسيالدى ستانسا جۇيەسىنىڭ مۇمكىندىگى زور. ءبىز وسى ستانسالار ارقىلى ادامداردى قۇتقارا الامىز. بۇگىنگى تاڭدا عارىشتان ادامداردىڭ بورانعا تاپ بولعانىن بىلە الامىز»، - دەيدى مينيستر.

بەيبىت اتامقۇلوۆتىڭ ايتۋىنا قاراعاندا، ماسەلەن پاۆلودار مەن استانانىڭ ورتاسىندا بوراندا ادام كولىگىمەن قالىپ قالسا، تەلەفونى جۇمىس ىستەمەسە، جۋىق ارادا ستانسا بولماسا، عارىش سپۋتنيكتەرى ارقىلى ونى قۇتقارۋعا بولادى. ياعني، جولدا قالعان ادامنىڭ كولىگىندە ارنايى تەتىك بولسا، سول تەتىكتى باسۋ ارقىلى قاي جەردە قالعانىن انىقتاۋعا بولادى.

«ول سول تەتىكتى باسسا، ءبىزدىڭ «قازاقستان عارىش ساپارى» ۇلتتتىق كومپانياسىنداعى وپەراتورىمىز ءتيىستى ورگاندارعا حابارلاما بەرە الادى. ءبىز عارىش ارقىلى سول كولىكتىڭ قايدا ەكەنىن بىلە الامىز. تاجىريبە جۇرگىزىپ تە كوردىك»، - دەيدى بەيبىت اتامقۇلوۆ.

مينيستر ءسوزى دالەلدى بولۋ ءۇشىن ناقتى مىسال كەلتىردى.

«وتكەن جىلى پاۆلودار وبلىسىندا «الان» اسكەري كولىگىمىزبەن تاجىريبە جاساعان ەدىك. «الانعا» مىنگەن اسكەريلەر عارىش ارقىلى حابار الىپ، جولدا قالعان، ىشىندە اياعى اۋىر ايەل بار كولىكتى تاۋىپ الدى. كولىكتىڭ ىشىندەگى ادامدار توڭىپ قالىپتى. قورعانىس مينيسترلىگىنىڭ اسكەريلەرى ەكى مەتر قار ۇستىندە ارنايى كولىك ارقىلى بارىپ، ادامداردى قۇتقارىپ قالدى. بوسانعان ايەل اسكەري كولىكتىڭ قۇرمەتىنە وراي بالاسىنىڭ اتىن «الان» دەپ قويدى. وسى جۇيە كوپتەگەن ادامداردى قۇتقارا الادى»، - دەيدى بەيبىت اتامقۇلوۆ.

ەسكە سالا كەتسەك، بۇگىن ق ر پارلامەنتى سەناتى حالىقارالىق قاتىناستار، قورعانىس جانە قاۋىپسىزدىك كوميتەتىنىڭ ءتورايىمى داريعا نازاربايەۆا باستاعان كوميتەت مۇشەلەرى استانانىڭ ىرگەسىندە تۇرعىزىلىپ جاتقان ۇلتتىق عارىش ورتالىعىندا بولىپ، اتقارىلىپ جاتقان جۇمىستارمەن تانىسقان بولاتىن. كوميتەت مۇشەلەرى ورتالىقتا تاجىريبەلىك ءوندىرىسى بار عارىشتىق تەحنيكانى ارنايى قۇراستىرۋشىلىق- تەحنولوگيالىق بيۋروسىنىڭ جۇمىسىن تەكسەردى.

اۆتور: ايان بەكەن ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى