قايرات نۇرتاستىڭ حيت انىنە كومپوزيتورلار تالاسىپ قالدى
بۇل تۋرالى «استانا» ارناسىنىڭ «ەل اۋزىندا» باعدارلاماسىندا ايتىلدى، دەپ حابارلايدى Stan.kz.
«اعام حابارلاسىپ: «مەنىڭ ءانىمدى عازيزحان شەكەربەكوۆتىڭ ءانى دەپ قايرات نۇرتاس ايتىپ ءجۇر»، - دەدى. ءسوزىن اقمارال لەۋبايەۆا جازعان ەكەن. ەربولدى ءانىن تىڭداماي، عازيزحان ءوزى شىعارعان عوي. ءبىراق ول ەربولدىڭ انىنە ۇقساپ كەتكەن. ءوزىم دە تۇسىنبەي قالدىم، اعامنىڭ ءانى ما، عازيزحاننىڭ ءانى ما»، - دەپ شاتاستى بايىربەكوۆا.
«تۋعان قارىنداسى اعاسىنىڭ ءانىن تانيتىن شىعار، قويىڭىزدارشى، نە اڭگىمە ول؟ ۇيات ەمەس پا؟ » - دەپ اشۋلاندى عازيزحان.
ۇرلىق جاساعان ەمەسپىن دەپ مالىمدەگەن عازيزحان ءاننىڭ شىعۋ تاريحىن ايتىپ بەردى.
«ول ءماتىن ماقپال ءجۇنىسوۆا اپامىزعا ارنالىپ جازىلعان. اقمارال لەۋبايەۆا وسىعان ءان جازىپ كورشى، ەربول بايىربەكوۆ دەگەن اعاڭ ءان جازدى، ءبىراق ول ءسال كەلىڭكىرەمەيدى دەدى. مەن ول كىسىنىڭ ءانىن دە تىڭداعان جوقپىن. جازدىم، سوسىن ونى قايرات نۇرتاس ورىندادى»، - دەپ ءتۇسىندىردى عازيزحان.
الايدا ەربول بايىربەكوۆ عازيزحاننىڭ بۇل سوزىنە اسا سەنبەيدى.
«ءاندى ماقپال اپامىزعا بەرەمىن دەپ ەدىڭىز، قايراتقا بەرىپسىز عوي. قۇتتى بولسىن، دەدىم. «بۇل ءاندى سەن جازىپ پا ەدىڭ؟ » دەپ ءوزى ويلانىپ قالدى. بىردەڭە دۇرىس ەمەس ەكەنى كورىنىپ تۇردى. كەيىن ءاندى تەلەديداردان بەرىپ جاتىر، استىندا باسقانىڭ ەسىمى جازىلعان. جىنىم كەلدى»، - دەيدى جازيرا بايىربەكوۆانىڭ اعاسى.
ەربول بايىربەكوۆ قانداي اقىن ءسوز جازسا دا، ءوز ءانىن انادايدان تانيتىنىن ايتادى. الايدا جازيرا بايىربەكوۆا اعاسىن جاقتاپ وتىرعان جوق. سەبەبى:
«عازيزحانعا: «بۇل مەنىڭ اعامنىڭ ءانى»، - دەپ ايتايىن دەسەم، انىق كوزىم جەتىپ تۇرعان جوق. ال اعاما: «عازيزحان سەنى تىڭداماي تۇرىپ شىعارعان»، - دەيىن دەسەم، ءبىرتۇرلى. اندەر كەيدە ءبىر- بىرىنە ۇقساپ جاتادى. ءوز باسىم عازيزحاننىڭ دا، اعامنىڭ دا ونەرىن جوعارى باعالايمىن. ەكەۋىنە دە جاق ەمەسپىن»، - دەيدى ول.
ال بىلىكتى مۋزىكانت مەدەۋ ارىنبايەۆ قوس ءاننىڭ نوتاسىندا ۇقساستىق جوق، الايدا ىرعاق جاعىنان ۇقسايدى دەپ ءتۇسىندىردى.
