قازاقستاندا بالالارعا قانداي اقپاراتتىق ءونىمدى كورسەتۋگە تىيىم سالىنادى؟
اتالعان زاڭ جوباسىن تانىستىرعان ءماجىلىس دەپۋتاتى بەكبولات تىلەۋحاننىڭ ايتۋىنشا، قۇجات بۇقارالىق اقپارات قۇرالدارى جانە باسقا دا قۇرالدار ارقىلى تارالاتىن زالالدى اقپاراتتان بالالاردى قورعاۋعا ارنالعان.
«الەم ەلدەرىنىڭ ءبىر-بىرىنە اشىقتىعى، تەلەكوممۋنيكاتسيالىق جەلىلەردىڭ دامۋى، اقپارات الماسۋداعى مۇمكىنشىلىكتەردىڭ مولايۋى، جالپى ءداۋىر ديدارىنىڭ وزگەرۋى وسى رۋحاني كەڭىستىكتىڭ تازالىعى تۋرالى ويلانۋعا جەتكىزدى. زاڭ جوباسىندا وسى سالاداعى الەمدىك تاجىريبە قازاقستانداعى اقپاراتتىق احۋالعا سايكەستەندىرىلگەن جانە ەلدەگى زاڭ اينالىمىندا جوق كەيبىر ۇعىمدار ەنگىزىلىپ وتىر»، - دەدى ول.
دەپۋتاتتىڭ ايتۋىنشا، ەڭ الدىمەن بەلگىلى ءبىر جاس توپتارىنداعى بالالار اراسىندا قانداي اقپاراتتىق ءونىمدى تاراتۋعا تىيىم سالىناتىندىعى جانە شەك قويىلاتىندىعى ايقىندالعان. ول ءۇشىن بالالارعا ارنالعان اقپاراتتىق ءونىمنىڭ جاس سىنىپتاماسى جانە جاس ساناتى دەيتىن ۇعىمدار ەنگىزىلىپ وتىر.
«جوبا بويىنشا مۇنداي اقپاراتتىق ءونىمنىڭ تومەندەگىدەي جاس ساناتتارى بەلگىلەنگەن. 6 جاسقا دەيىن، 6 جاستان اسقان، 12 جاستاعى، 14 جاستاعى، 16 جاستاعى بالالاردىڭ جەتىلۋ جانە دۇنيەتانۋ مۇمكىندىگىنە سايكەس جىكتەلگەن.
جالپى العاندا زاڭ جوباسى بويىنشا قاتىگەزدىك پەن زورلىق-زومبىلىققا قۇرىلعان، بالالاردىڭ ومىرىنە قاتەر توندىرەتىن ءىس-ارەكەتكە، سونداي-اق سۋيتسيدكە يتەرمەلەيتىن، پورنوگرافيالىق جانە ارنايى سەكسۋالدى-ەروتيكالىق كورىنىستەردى قامتيتىن اقپاراتتىق ونىمدەرگە تىيىم سالۋ قاراستىرىلۋدا. مۇنىمەن بىرگە وتباسى ينستيتۋتىن جوققا شىعاراتىن جانە ۇلتتىق داستۇرلەرگە قارسى ۇگىتتەيتىن اقپاراتتاردا بالالارعا زياندى دەپ تابىلعان. تەلەارنالار وسى تالاپقا سايكەس كەلەتىن اقپاراتتىق ءونىمدى جانە وعان سايكەستەندىرىلگەن تاڭبامەن بەلگىلەپ قانا ەفيرگە تاراتۋى ءتيىس. كەرىسىنشە جاعدايدا ولارعا زاڭمەن شارا قولدانىلادى»، - دەدى بەكبولات تىلەۋحان.
سونىمەن قاتار ونىڭ سوزىنە قاراعاندا، مەملەكەتتىك باسقارۋ جانە قۇقىق قورعاۋ ورگاندارىنىڭ قىزمەتىن جەڭىلدەتۋ ءۇشىن العاش رەت بالالارعا ارنالعان اقپاراتتىق ونىمگە انىقتاما بەرىلىپ وتىر. مۇنداي اقپاراتتىق ءونىم باعىتى، تاقىرىبى، مازمۇنى، بەزەندىرىلۋى بويىنشا بالاعا تىكەلەي ارنالعان ءونىم بولىپ تابىلادى.
