قازاق فۋتبولىنىڭ اڭىزى كارەراسىن اياقتاۋى مۇمكىن

39 جاستاعى سامات سماقوۆ جاڭا جىل مەرەكەسىنەن كەيىن جاسىل الاڭعا ورالمايتىنى جايلى مالىمدەمە جاساۋى مۇمكىن. وعان جاراقات نەمەسە ويىنشىنىڭ دەنە قۋاتى ەمەس، باسشىلىق قىزمەتتەردەن كوپتەگەن ۇسىنىستاردىڭ ءتۇسۋى سەبەپ بولىپ وتىر.

س. سماقوۆتى پرەمەر-ليگانىڭ ءۇش بىردەي كلۋبى جانە قازاقستان فۋتبول فەدەراتسياسى قىزمەتكە شاقىرۋدا. وسىعان وراي، اتى اڭىزعا اينالعان فۋتبولشى قازىر ۇسىنىستاردى قاراستىرۋدا.

«قازىر ەشتەڭە ايتا المايمىن، جاڭا جىلدان كەيىن تەلەفون شالىڭىز، سول كەزدە ءبارى انىق بولادى. شەشىمىم تۋرالى ەڭ الدىمەن سىزدەر حاباردار بولاسىزدار»، - دەپ تەلەفون سۇحباتىن قىسقا قايىردى فۋتبولشى.

سامات سماقوۆ قازاقستان قۇراماسى ساپىنداعى ويىندار سانى بويىنشا رەكوردشى (75 ويىن) ءارى ەلدەگى ەڭ كوپ جۇلدە العان فۋتبولشىلاردىڭ ءبىرى.

ول التى رەت ەل چەمپيونى اتانعان. بۇل كورسەتكىش بويىنشا دوسى اندرەي بوگومولوۆ قانا جەتى التىن مەدالمەن ونىڭ الدىندا تۇر. كاسىبي مانسابى بارىسىندا تاجىريبەلى فۋتبولشى «ەلىم-اي»، «ەرتىس»، «روستسەلماش» (رەسەي)، «جەڭىس»، «قايرات»، «اقتوبە» جانە «ريزەسپور» (تۇركيا) كلۋبتارىندا ونەر كورسەتكەن. ال سوڭعى ءبىر جارىم جىلى شىمكەنتتىڭ «ورداباسى» كومانداسىندا ءوتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى