مەملەكەت قارجىسىن الاياقتىق جولمەن يەمدەنگەن اقتوبەلىك دەپۋتات سوتتالدى

اقتوبە وبلىستىق ءماسليحاتىنىڭ دەپۋتاتى، كاسىپكەر باقىتجان ەرجانوۆ قىلمىستىق كودەكستىڭ «الاياقتىق»، «قۇقىق قورعاۋ ورگانى، ارناۋلى مەملەكەتتىك ورگان قىزمەتكەرىنىڭ، اسكەري قىزمەتشىنىڭ ومىرىنە قول سۇعۋشىلىق»، «دەنساۋلىققا قاساقانا اۋىر زيان كەلتىرۋ» باپتارى بويىنشا ايىپتالعان بولاتىن. بۇعان دەيىن حابارلاعانىمىزداي، دەپۋتات ءوز ايەلىنىڭ اتىنداعى شارۋا قوجالىعىنان اسىل تۇقىمدى مالدى ساتىپ الىپ، مەملەكەتتەن سۋبسيديا راسىمدەگەن. سونىمەن قاتار، قول استىنداعى جۇمىسشىنى ۇرىپ، پروكۋرورعا بەيادەپ سوزدەر ايتقان.

ءىس ماتەريالىنا سۇيەنسەك، باقىتجان ەرجانوۆ حرومتاۋ اۋداندىق پروكۋراتۋراسىنىڭ پروكۋرورى ج. ەسپانوۆقا «جانىبەك ساعان ەسكەرتەمىن، ماعان جاماندىق ىستەسەڭ جاماندىق ىستەۋ مەنىڭ قولىمنان دا كەلەدى. ماعان ءالىڭ كەلمەيدى» دەپ ومىرىنە ناقتى قاۋىپ-قاتەر توندىرگەن. بىرنەشە ايعا سوزىلعان تەرگەۋ جۇمىستارىنان سوڭ ءىس سوتقا جەتىپ، ۇكىم شىقتى.

«باقىتجان ەرجانوۆ قىلمىستىق كودەكستىڭ 190-بابى، 4-بولىگى، 2-تارماعى، 380-بابى 1-بولىگى، 106-بابى، 1-بولىگىندە كورسەتىلگەن قىلمىستى جاساۋدا كىنالى دەپ تانىلىپ، 3 جىل مەملەكەتتىك قىزمەتپەن اينالىسۋ قۇقىعىنان، 3 جىل 9 ايعا باس بوستاندىعىنان ايىرۋ جازاسى تاعايىندالسىن. قىلمىستىق كودەكستىڭ 63-بابىن قولدانىپ، تاعايىندالعان جازانى شارتتى دەپ ەسەپتەپ، بارلىق سىناق مەرزىمىنە پروباتسيالىق قاداعالاۋ تاعايىندالسىن. ۇكىم زاڭدى كۇشىنە ەنگەنگە دەيىن كۇزەتپەن ۇستاۋ تۇرىندەگى بۇلتارتپاۋ شاراسىن ەشقايدا كەتپەۋ جانە ءوزىن دۇرىس ۇستاۋ قولحاتىنا وزگەرتىپ، سوت زالىنان دەرەۋ بوساتىلسىن»، - دەدى حرومتاۋ اۋداندىق سوتىنىڭ سۋدياسى ا. بالمۇحانوۆ.

سوتىمەن قاتار، باقىتجان ەرجانوۆ 281 مىڭ تەڭگە سوت شىعىنىن وتەۋى ءتيىس. ءارى بارلىق جابىرلەنۋشىلەردىڭ كەشىرىمىن الىپ، مەملەكەتتىك زالال تولىق وتەلدى. ءىس ماتەريالىندا، باقىتجان ەرجانوۆتىڭ قىلمىستىق كودەكستىڭ «الاياقتىق» بابى بويىنشا جالعان قۇجاتتار تاپسىرىپ، مەملەكەتتىڭ 142374598 تەڭگەسىن جىمقىرعانى ايتىلدى.

سوت ۇكىمى زاڭدى كۇشىنە ەنگەن جوق.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى