لوندوننىڭ ورتاسىندا اڭ قۇستار ءورىپ جۇرەدى

ءبىز ەۋروپا دەگەن مەگاپوليستەر، بىجىناعان قالا، بيپىلداعان ماشينا، قىسقاسى مازاسىز ءومىر دەپ ويلايمىز عوي. سونداي «سترەسستەن» كەلگەن ەۋروپالىقتاردى تابيعاتىمىزبەن تاڭقالدىرماق بولامىز. ال ەۋروپاعا كەلگەندە، تىپ-تىنىش جايلى ءومىردى، ەكى-ءۇش قاباتتان اسپايتىن ەسكى ۇيلەردى، ەلەكتروموبيل مەن ۆەلوسيپەدتى جانە ناعىز تامىلجىپ تۇرعان تابيعاتتى كورەسىڭ.

بىردە Calstock دەگەن جەردەگى يان مەن رەبەكانىڭ ۇيىنە قوناققا باردىم. يان ايتادى، «ءۇيدى ادەيى تەمىر جولدىڭ قاسىنان الدىق، ايتپەسە ەلىكتەر باقشاعا تىنىم بەرمەيدى» دەيدى. مەندە كادىمگى قازاق رەتىندە «ول نە دەگەن قاپتاعان ەلىك، ونى نەگە ەشكىم اتپايدى؟» دەگەن سۇراق تۋادى. «جوق، ولاردى حالىق جاقسى كورەدى. ارينە، باقشاسىن جايپاپ كەتسە ءسال قىنجىلۋى مۇمكىن، ءبىراق اتپايدى» دەيدى.

اۆتوبۋستىڭ ەكىنشى قاباتىندا وتىرىپ، قالا ورتالىعىنداعى زيراتتىڭ ماڭىنان ءوتىپ بارا جاتقاندا، ونىڭ ىشىندە دە جايىلىپ جۇرگەن ەلىكتەردى كورەسىڭ. نوتتينگەمدەگى ۋولتون پاركتە ءتىپتى، ەلىكتەر جانىڭدا جۇرە بەرەدى. ءبىز ەلىكتى حايۋاناتتار باعىنان عانا كورىپ، ەكى ءجۇز تەڭگەگە ءسابىز ساتىپ الىپ بەرەمىز. كوشپەندىنىڭ ۇرپاعىمىز دەيمىز. ءبىراق اڭ-قۇس كورسەك تاڭقالامىز. جەرىمىز سونداي ۇلكەن، حالقىمىز سونداي از، ءبىراق اڭ-قۇستىڭ ءبارىن اتىپ بىتىرگەنبىز. ءتىرى قالعاندارى بىزدەن قاشىپ، كوزگە كورىنبەيتىن الىستارعا، اۋلاققا كەتىپ قالعان. ال مۇنداعى قۇستارعا دا تاڭقالاسىڭ. اققۋ، قاز، ۇيرەك، قىرعاۋىل، شاعالا، ءبىز اتىن بىلمەيتىن نەبىر ءتۇرلى-ءتۇستى قۇستار... قالا ورتاسىنداعى ساياباقتاردا پىر-پىرلاپ جۇرەدى. ارنايى جەمدەگەندەي، جارىلعالى تۇرادى. جانە ادامنان قورىقپايدى. ماڭدايىڭدى قاناتىمەن سيپاپ ۇشادى. لوندوننىڭ ورتاسىندا تۇلكىلەر جۇرەدى، سۇر تيىندەر سەنىڭ جانىڭا كەپ تاماق سۇراپ تۇرادى.

بىزگە British Council-دا ساباق بەرگەن اعىلشىن ءتىلى مۇعالىمى كريستينا، قازاقستاندا بولعاندا كولساي مەن قايىڭدىعا بارعان عوي. قايىڭدىعا دەيىن جاياۋ شىعارىن شىعىپ، تۇسەردە ءبىر دوربا قوقىس كوتەرە كەلىپتى. «نەگە سونداي سۇلۋ جەرگە قوقىس تاستايسىزدار؟» دەپ تاڭقالادى. «نەگە قۇرىعاندا ءار سانالى ادام ءار ساناسىز ادامنىڭ ارتىنان جيناپ جۇرمەيدى؟» دەپ تە ويلاعان سەكىلدى. سەللوفان دوربا مەن پلاستيك بوتەلكە دەگەن بولەك اڭگىمە.

تۋريزمدى دامىتامىز، بۋراباي بار، باياناۋىل بار، كولساي بار، تابيعاتىمىزبەن تاڭقالدىرامىز دەپ كوپىرەمىز. قازىرگى جاعدايدا ءبىز ءبىز تابيعاتىمىزبەن ەمەس، تابيعاتقا دەگەن سالاقتىعىمىزبەن عانا «تاڭقالدىرا» الامىز.

جازبا اۆتورى: ءاسيا باعداۋلەت قىزى

today.kz 

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى