نازاربايەۆ: ءۇمىت ارتقان كەيبىر جاستاردىڭ قاقپانعا ءتۇسىپ جاتقانى قوبالجىتادى
وتاندىق ب ا ق وكىلدەرىمەن كەزدەسۋ بارىسىندا پرەزيدەنتكە «سەنىم ارتقان جاستاردىڭ كەيبىرى ءۇمىتىڭىزدى اقتاي الماعان كەزدەر بولدى عوي... جاستارعا دەگەن سەنىمىڭىزدى جوعالتىپ العان جوقسىز با؟» دەگەن سۇراق قويىلدى.
«قازىر مىناۋ اقپاراتتىق كەزەڭنىڭ ءوزى، سيفرلاندىرۋ - بۇل جاستاردىڭ جۇمىسى. جاستار تەز ءىلىپ اكەتەدى. جاستار باسقاشا جاعدايدا وقىدى. باسقاشا زاماندا ءومىر ءسۇرىپ جاتىر. جاستارعا سەنبەي كىمگە سەنەمىز؟ سولاي بولدى ەكەن دەپ بۇكىل جاستاردىڭ بارلىعىنا سەنبەۋ كەرەك دەپ ايتۋعا بولمايدى. ءبارىبىر دە جاستارعا سەنەمىن. بولاشاق سولاردىڭ قولىندا. سولارعا سەنەمىز، سولاردى قويامىز»، - دەيدى ەل پرەزيدەنتى.
ەلباسى ءوز سوزىندە قازىر 35 جاستاعى ادامدى جاس دەپ ايتۋعا بولمايتىنىن اتاپ ءوتتى.
«35 جاستاعى ادام وقۋىن ءبىتىردى. تاجىريبە الدى. كوپ جەردە جۇمىس اتقاردى. قانداي لاۋازىمعا بولسا دا قويۋعا بولادى. ال ءبىراق سول جىگىتتەر مەن قىزدار ءۇمىتىڭدى اقتاماي، ءوز-وزىنەن بارىپ قاقپانعا ءتۇسىپ جاتسا، ارينە، بۇل وتە قوبالجىتاتىن جاعداي. سوندىقتان، سەنىمدى اقتاپ، وتانىڭا جۇمىس ىستەۋ كەرەك. ادال بولساڭ باقىتقا جەتەسىڭ. ەل- جۇرت سىيلايدى. اعايىن- تۋىسقانىڭ، بالا-شاعاڭ ريزا بولادى. ءالى دە سەنە بەرەمىز. ءالى دە جاستاردى قويا (قىزمەتكە - رەد.) بەرەمىز»، - دەيدى نۇرسۇلتان نازاربايەۆ.
مەملەكەت باسشىسى بۇگىنگى تاڭدا قازاقستاننىڭ بيلىگىندەگى ادامداردىڭ ىشىندە دە جاستاردىڭ ۇلەسى كوپ ەكەنىن اتادى.
«بۇگىنگى ۇكىمەتتىڭ مۇشەلەرى، مينيسترلەردىڭ جاسى - قىرىقتىڭ توڭىرەگىندە. ودان دا جاستارى ءجۇر. 35 جاستاعى مينيسترلەرىمىز بار. وبلىس اكىمدەرى بار. بولاشاق باعدارلاماسى بويىنشا شەتەلدە وقىپ كەلگەن 12 مىڭ ورەندى اتاپ وتۋگە بولادى. سوندىقتان، جاستارعا سەنەمىز. جاستار ءۇمىتتى اقتاسىن»، - دەپ ءتۇيدى ەلباسى.
ەسكە سالا كەتسەك، 22- جەلتوقسان كۇنى ەلباسى نۇرسۇلتان نازاربايەۆ ەلىمىزدەگى جەتەكشى ب ا ق وكىلدەرىنە 2017-جىلدى قورىتىندىلاۋعا ارنالعان سۇحبات بەردى. وندا پرەزيدەنت قازاق قوعامىنداعى ەلەۋلى وزگەرىستەر مەن وزەكتى ماسەلەلەر تۋرالى جۋرناليستەر سۇراعىنا جاۋاپ بەردى. اتالمىش سۇحباتتىڭ تەليەۆيزيالىق نۇسقاسى بۇگىن رەسپۋبليكالىق تەلەارنالاردىڭ ەفيرىنەن كورسەتىلدى.
اۆتور: ايان بەكەن ۇلى
