ايەلدى ەكىنشى سورتتاعى ادام سانايتىن ەل ەمەسپىز - نۇرسۇلتان نازاربايەۆ
«قازىرگى زاماندا ءدىني احۋال ىلعي دا كوز الدىمىزدا بولۋى كەرەك. سيريادا بولىپ جاتقان، ءبىزدىڭ ىشىمىزدە دە بولىپ جاتقان جاعدايلاردى كورىپ وتىرسىزدار. انەۋ كۇنى بارلىق مولدالارمەن كەزدەسكەنىمدە ونى ايتقانمىن. جاقىندا ولاردىڭ باس قوسۋى بولىپ، جاڭادان ءمۇفتي سايلاندى. ول جەردە دە ايتتىم. ءبىز، قازاقستاندىقتار، زيالى قاۋىمبىز، ەلمىز»، - دەدى ەلباسى.
قازاقستان پرەزيدەنتى ءدىن ماسەلەسى مەملەكەتتەن بولەك تۇراتىندىعىن اتاپ ءوتتى.
«دەگەنمەن ونى باسقارماسا بولمايدى. سوندىقتان ول جاقتا نە ايتىلىپ جاتقانىن، كىم مەشىت سالىپ جاتقانىن ەگجەي-تەگجەيلى ءبىلىپ وتىرۋ ءۇشىن مينيسترلىك قۇرىلدى. اكەسىنىڭ اتىنان مەشىت سالادى، ونىڭ ىشىندە نە ايتىپ جاتقانىن ەشكىم بىلمەيدى. ءبىز مەملەكەتپىز. مەملەكەت بولعاننان كەيىن ونىڭ بارلىعىن قاداعالاۋىمىز كەرەك»، - دەدى نۇرسۇلتان نازاربايەۆ.
مەملەكەت باسشىسى قازاق ايەلدەرى ەش ۋاقىتتا قارا كيىم كيىپ، تۇمشالانىپ جۇرمەگەندىگىن باسا ايتتى.
«ايەلدەردى ەكىنشى سورتتاعى ادام سانايتىن ەل ەمەسپىز. ونى دا قاراۋ كەرەك. ساقالى بەلىنە تۇسكەن ادامداردىڭ جالاڭاياق شورتىمەن جۇرگەنى دە بىزگە جارامايدى. دىندە اتا-بابامىزدان قالعان جولىمىز بار. سونىمەن ءجۇرۋىمىز كەرەك. مەنىڭ ايتارىم، بارلىق مەملەكەتتەردە ءدىن جۇمىسى مەملەكەت قولىندا. ول تۇركيادا دا، ساۋد ارابياسىندا دا، ناعىز مۇسىلمانبىز دەگەن اراب ەلدەرىندە دە بار. ءبىز دە قاداعالاپ وتىرۋىمىز كەرەك»، - دەدى مەملەكەت باسشىسى.
قازاقستان پرەزيدەنتى بۇگىندە ەلىمىزدە ءۇش مىڭعا جاقىن مەشىت اشىلعاندىعىن ەسكە سالدى.
«بارام دەگەنى بارادى، قاي دىنگە باراتىنىن ءوزى بىلەدى. دەگەنمەن، ەلىمىزدە ەشقانداي بۇلىك سالماۋى كەرەك. باسقا اعىمعا، باسقا شارۋاعا ءدىندى بۇرىپ اكەتىپ، بۇلىك شىعاراتىن تەرروريستەر شىقپاۋى ءتيىس»، - دەپ باسا ايتتى ەلباسى.
