نازاربايەۆ: مەملەكەتتىك قىزمەتتە ەڭبەك ەتۋ ءۇشىن مەملەكەتتىك ءتىلدى بىلۋگە تۋرا كەلەدى
«مەن 17 جاسىمدا قازاق مەكتەبىن ءبىتىرىپ، ۋكرايناعا جول تارتىپ، ودان كەيىن وزدەرىڭىز بىلەتىندەي تەمىرتاۋدىڭ مەتاللۋرگيالىق كومبيناتىنا كەلدىم. ورىس ءتىلدى ورتادا 20 جىلدان استام ۋاقىت جۇرگەننەن كەيىن ءتىلدى (قازاق ءتىلىن - اۆت.) تازا ۇمىتىپ قالدىم. سەكسەنىنشى جىلداردىڭ سوڭىندا قاراعاندى وبلىسىنان الماتىعا ورتالىق كوميتەتتىڭ حاتشىسى بولىپ كەلدىم. مىنە، وسى كەزدە قازاق تىلىندە سويلەۋىم كەرەك بولدى. وسى كەزدە ماعان قازاق تىلىندە شىعاتىن «سوتسياليستىك قازاقستان» گازەتىن وقي بەر دەپ كەڭەس بەردى. وڭاي بولعان جوق. وقىپ، وقىپ اقىرى تىلدىك قورىمدى ۇلعايتىپ الدىم. ءبارى دە ادام ءوزىن-ءوزى قالاي جىگەرلەندىرەدى - سوعان بايلانىستى»، - دەيدى وتاندىق ب ا ق وكىلدەرىمەن كەزدەسۋ بارىسىندا قازاقستان پرەزيدەنتى.
نۇرسۇلتان نازاربايەۆ ءوز سوزىندە مەملەكەتتىك قىزمەتتە جۇمىس اتقارۋ ءۇشىن مەملەكەتتىك ءتىلدى ءبىلۋ مىندەتتى ەكەنىن اتاپ ءوتتى.
«ءبىراق، مەملەكەتتىك قىزمەتتەن بولەك، باسقا دا جۇمىستار جەتەرلىك. ال مەملەكەتتىك قىزمەتكە ۇمتىلعان ادام ءتىلدى مەڭگەرۋ كەرەك. قازاقستانداعى بارلىق ەتنيكالىق توپتاردىڭ قازاق ءتىلىن ءبىلۋى - حالىقتى ۇيىستىرا تۇسەدى. لوندونعا نەمەسە ۆاشينگتونعا بارىپ، اعىلشىن تىلىندە سويلەسەڭ - سەن جۇرتپەن تەز ءتىل تابىساسىڭ. ال ماسكەۋدە ورىس ءتىلىن مەڭگەرمەي تۇرىپ، قالاي جۇمىس ىستەيسىڭ؟ مۇمكىن ەمەس. نەمەسە گەرمانياعا بارىپ، نەمىس ءتىلىن بىلمەي جۇمىس ىستەۋ مۇمكىن ەمەس قوي؟.. ءتىل ءبارىمىزدى جاقىنداستىرادى»، - دەيدى مەملەكەت باسشىسى.
نۇرسۇلتان نازاربايەۆ ءوز سوزىندە لاتىن ءالىپبيىن ەنگىزۋدىڭ تۇپكى ماقساتى تۋرالى ءسوز قوزعادى.
«بۇكىل امەريكا قۇراما شتاتتارى - ميگرانتتار ەلى. بۇكىل مەملەكەتتەن كەلگەن ادامداردى ول مەملەكەتتە اعىلشىن ءتىلى ءبىر ۇلت رەتىندە جاقىنداستىرادى. سوندىقتان، ءتىلدى سونداي رولگە جەتكىزگىم كەلەدى. بۇل جەكە باستىڭ ماقساتى ەمەس. ماقسات - ءبىزدىڭ كوپ ۇلتتى مەملەكەتىمىزدىڭ حالقىن بىرەگەيلىگىن قالىپتاستىرۋ»، - دەپ ءتۇيدى قازاقستان پرەزيدەنتى.
اۆتور: ايان بەكەن ۇلى
