پاۆلودار حيرۋرگتارى ورتالىق ازيا ەلدەرى اراسىندا العاش رەت مۇزداتۋ ءادىسى ارقىلى جۇرەككە وپەراتسيا جاسادى
جاڭا ءادىس ناۋقاستىڭ جۇرەگىندەگى بۇلشىق ەتتىڭ ءبىر بولىگىن قاتىرۋ ارقىلى جۇزەگە اسادى. ول ءۇشىن -140 گرادۋستان تومەن تەمپەراتۋرا قولدانىلادى. جۇرەك قاعىسى مەن ىرعاعىنىڭ بۇزىلۋى بۇگىندە كەڭ تارالعان سىرقات تۇرىنە جاتادى. كارديوحيرۋرگتار ونى اشىق وپەراتسيا ارقىلى ەمدەيدى. بۇل جولى دارىگەرلەر جۇرەك قاقپاعىن قالپىنا كەلتىرۋ ءۇشىن وپەراتسيا جاسادى.
ەرماعامبەت قۋاتبايەۆ، وبلىستىق كارديولوگيالىق ورتالىق ديرەكتورىنىڭ مىندەتىن اتقارۋشى:
- ەلەكترود ارقىلى ارگون دەگەن گازدى -140 گرادۋسقا دەيىن تومەندەتىپ، جۇرەكتىڭ ىرعاعىنىڭ وزگەرۋىن، اۋرۋ ورىندارىن مۇزبەنەن قاتىرىپ ەمدەيدى. بۇل جۇرەكتىڭ ىرعاعىن تۇزەتۋگە مۇمكىندىك بەرەتىن ءادىس.
بۇل - ەمدەۋدىڭ اسا كۇردەلى ءتۇرى. اسقان شەبەرلىكتى تالاپ ەتەدى. دارىگەرلەر ءمۇلت كەتكەن جاعدايدا اعزانىڭ ساۋ جەرىنە زاقىم كەلەتىنىن جوققا شىعارمايدى. سوندىقتان اق حالاتتىلارعا ارتىلاتىن جاۋاپكەرشىلىك ەسەلەنەدى.
ەرماعامبەت قۋاتبايەۆ، وبلىستىق كارديولوگيالىق ورتالىق ديرەكتورىنىڭ مىندەتىن اتقارۋشى:
- بۇل - قيىن جاعدايدا جاسالاتىن وپەراتسيا. وڭاي وپەراتسيا ەمەس. بۇل بۇگىنگى وپەراتسيا - قازاقستاندا جانە ورتالىق ازيادا العاش رەت اشىق جۇرەككە وسىنداي تاسىلمەن جاسالىپ جاتقان وپەراتسيا. وپەراتسيانىڭ بۇل ءتۇرى پاۆلوداردىڭ كاردي ورتالىعىندا عانا ەمەس، قازاقستاندا العاش رەت جاسالىپ وتىر.
حيرۋرگيالىق كريوبلياتسيا ءادىسى جاقسى دامىعان تۇركيادان ارنايى پروفەسسور شاقىرتىلىپتى. شەتەلدىك ماماننىڭ پىكىرىنشە، وسى تاسىلمەن ەمدەۋدىڭ 90 پايىزى وڭ ناتيجە بەرەدى.
ءباھادۇر ينان، پروفەسسور (تۇركيا):
- بۇل ءادىس الەمدە قولدانىلا باستاعانىنا كوپ بولعان جوق. ءبىز ونىڭ تيىمدىلىگىنىڭ زور ەكەنىنە كوز جەتكىزدىك. ءوز تاجىريبەمىز ارقىلى وڭ باعا بەرىپ وتىرمىز. قازاقستاندىق ارىپتەستەرىمىز دە ەمدەۋدىڭ وسى ءتۇرىن جاقسى مەڭگەرەدى دەگەن سەنىمدەمىز.
پاۆلوداردا جۇرەك ىرعاعى بۇزىلعان ەكى ناۋقاسقا وپەراتسيا جاسالدى. ستاتيستيكالىق مالىمەتتەرگە سۇيەنسەك، مۇنداي سىرقات تۇرىنە ەلىمىز بويىنشا تۇرعىنداردىڭ 5 پايىزى شالدىققان.
www.24.kz
