سوورونباي جيەنبەكوۆ نۇرسۇلتان نازاربايەۆتى بىشكەككە رەسمي ساپارمەن كەلۋگە شاقىردى
«ءبىزدىڭ ەلدەرىمىز اراسىندا ديپلوماتيالىق قارىم- قاتىناس ورناعان كۇننەن باستاپ شيرەك عاسىردىڭ ىشىندە ەكىجاقتى ءوزارا ءىس- قيمىلدى جولعا قويۋ بويىنشا ۇلكەن جۇمىس اتقارىلدى. تەڭ قۇقىلىق، ءوزارا تيىمدىلىك جانە ءبىر- ءبىرىنىڭ ىشكى ىسىنە ارالاسپاۋ ۇستانىمدارى نەگىزىندە ەلدەرىمىز اراسىنداعى دوستىق، تاتۋ كورشىلىك جانە ستراتەگيالىق سەرىكتەستىك قارىم- قاتىناستى بەلسەندى نىعايتۋعا نيەتتىمىز. مەن نۇرسۇلتان ءابىش ۇلىن قىرعىزستانعا رەسمي ساپارمەن كەلۋگە شاقىردىم. اتالعان ساپار اياسىندا قىرعىزستان مەن قازاقستاننىڭ جوعارى مەملەكەت ارالىق كەڭەسىنىڭ كەزەكتى وتىرىسىن وتكىزۋ جوسپارىمىزدا بار»، - دەدى ول اقوردادا ەلباسى نۇرسۇلتان نازاربايەۆ وتكەن شاعىن جانە كەڭەيتىلگەن قۇرامداعى كەلىسسوزدەردەن كەيىنگى بىرلەسكەن مالىمدەمە بارىسىندا.
سونىمەن قاتار سوورونباي جيەنبەكوۆ قازاقستان پرەزيدەنتىن 2018 -جىلدىڭ قىركۇيەك ايىندا ىستىقكول جاعالاۋىندا وتەتىن ءۇشىنشى دۇنيەجۇزىلىك كوشپەلىلەر ويىنىڭ اشىلۋ سالتاناتىنا شاقىرعانىن ايتتى.
«كەلەسى جىلى قىرعىزستان ۇلى قىرعىز جازۋشىسى شىڭعىس ايتماتوۆتىڭ 90 جىلدىعىن اتاپ وتەدى. قازاقستان تىسقارى قالىپ قويماي، اتالعان داتاعا ارنالعان مەرەكەلىك ءىس- شارالارعا بەلسەنە قاتىسادى دەپ ۇمىتتەنەمىن. ويتكەنى، قازاقستاندىقتار اتالعان كورنەكتى قالامگەردىڭ شىعارمالارىن جاقسى كورەدى جانە وقيدى»، - دەدى قىرعىز پرەزيدەنتى.
نۇرسۇلتان نازاربايەۆتىڭ ايتۋىنشا، شاعىن جانە كەڭەيتىلگەن قۇرامداعى كەلىسسوزدەر بارىسىندا وڭىرلىك، جاھاندىق كۇنتارتىپتەگى وزەكتى ماسەلەلەر بويىنشا پىكىر الماسىلىپ، مادەني- گۋمانيتارلىق سالاداعى ىنتىماقتاستىقتى ودان ارى جاندارۋ قاجەتتىلىگى اتالىپ وتىلگەن.
«تالقىلاۋ قاجەت بولعان بارلىق ماسەلەلەر تالقىلاندى. ءبىزدىڭ قارىم- قاتىناسىمىزعا كەلەشەكتە كەدەرگى كەلتىرۋى مۇمكىن ايتىلماي قالعان، قانداي دا ءبىر جاسىرىن ماسەلەلەر قالمادى. جانە وسىناۋ سەنىمگە نەگىزدەلگەن اشىق احۋالدا ءبىز قۇرىلاتىن كوميسسيالار مەن توپتار وسى ۋاعدالاستىقتاردىڭ ءاربىر تارماعىنىڭ ورىندالۋىن باقىلاۋعا الادى دەپ مامىلەگە كەلدىك»، - دەدى ەلباسى.
اۆتور: مارلان جيەمباي
